HR hub-მა ახალი პროექტი წარადგინა

18 ნოემბერს, HR hub Next-ის პრეზენტაცია გაიმართა. HR hub Next- ეს არის HR hub-ის ახალი პროექტი, რომელიც მომავალი HR მენეჯერებისთვისაა განკუთვნილი. კლუბის შექმნის მიზანი ახალგაზრდა, დამწყები სპეციალისტებისთვის ცოდნის გაღრმავება, პროფესიული ზრდა და გამოცდილების გაზიარებაა. HR hub Next-ში გაწევრიანების სურვილი ძალიან ბევრმა ადამიანმა გამოთქვა, თუმცა საბოლოოდ 65 შეირჩა.

პროექტს ჰყავს 10 კომპანიის წარმატებული ადამიანური რესურსების მენეჯერი, რომლებიც HR hub Next-ის წევრებს HR-თან დაკავშირებულ სხვადასხვა თემაზე, ტრენინგებს ჩაუტარებენ.

HR hub Next-ის პრეზენტაციაზე, წევრები ლოტოტრონის საშუალებით გადანაწილდნენ მენტორებთან. 3 თვის განმავლობაში მათ უშუალო კომუნიკაცია ექნებათ მენტორთან, მიიღებენ რჩევებს პიროვნული და კარიერული ზრდის ნაწილში და დიდ პრაქტიკულ ცოდნას დააგროვებენ.

პროექტის პრეზენტაციაზე მოეწყო სახალისო გაცნობის თამაში, რომლის გამარჯვებულებსაც, პალიტრა მედია ჰოლდინგისგან საჩუქრად წიგნები გადაეცათ. სადაზღვევო კომპანია "პრაიმმა“ მენტორებს საჩუქრად სპეციალური ფასდაკლების ვაუჩერები გადასცა.

ღონისძიებამ მხიარულ და სასიამოვნო გარემოში ჩაიარა. HR hub Next-ის პირველი შეხვედრა 22 ნოემბერს გაიმართება.

HR hub Next-ის მხარდამჭერები არიან პალიტრა მედია ჰოლდინგი, სადაზღვევო კომპანია "პრაიმი“ და გლობალური კვლევითი-საკონსულტაციო კომპანია"ACT”.

მედია მხარდამჭერი: პალიტრა მედია ჰოლდინგი და რადიო იმედი.