ავტორი:

ავსტრიის პრეზიდენტის შვილი საქართველოში საცხოვრებლად გადმოდის - "ყველას ვუყვები, როგორი ევროპული ქვეყანაა"

ავსტრიის პრეზიდენტის შვილი საქართველოში საცხოვრებლად გადმოდის - "ყველას ვუყვები, როგორი ევროპული ქვეყანაა"

საქართველოს შესახებ ავსტრიის პრეზიდენტის, ალექსანდერ ვან დერ ბელენის შვილმა, ფლორიანმა სამხრეთ კორეაში, საქართველოს დელეგაციისგან შეიტყო. მან გადაწყვიტა, რომ აუცილებლად მოინახულებდა ქვეყანას და საკუთარი თავისთვის მიცემული პირობა ზუსტად ერთი წლის შემდეგ შეასრულა.

იხილეთ ვიდეო: ავსტრიის პრეზიდენტის შვილი საქართველოში გადმოსვლის მიზეზებზე საუბრობს - სიუჟეტი ქართული ტიტრებით

პორტალი Sova.news წერს, რომ თბილისში ფლორიანი 2017 წლის აპრილში ჩამოვიდა, საქმიანი ვიზიტით, თუმცა გამგზავრება რამდენიმე დღით გადადო და მოახერხა, სვანეთი მოენახულებინა, რომელმაც მშობლიური, მაღალმთიანი ტიროლი გაახსენა - იქაც, სვანეთის მსგავსად, დიალექტზე საუბრობენ და სხვა ავსტრიელებს ტიროლელების ენის გაგება უჭირთ.

ავსტრიაში ფლორიანი შთაბეჭდილებებით დატვირთული დაბრუნდა და როგორც თავად ამბობს, დაძინებაც კი უჭირდა, თითქოს, რაღაც არ აძლევდა მოსვენებას.

მას შემდეგ ის საქართველოში რამდენჯერმე იმყოფებოდა, რომ ქვეყანა უკეთ გაეცნო. ამბობს, რომ საქართველოს საინვესტიციო პოტენციალის შესახებ ქვეყნის პირველი პირების განცხადებების არ ჯეროდა, ამიტომ გადაწყვიტა, თავად ენახა, რამდენად რეალური იყო ხელისუფლების წარმომადგენლების განცხადებები.

„მინდოდა გამერკვია, ნამდვილად არის თუ არა საქართველო ასეთი ლიბერალული, კორუფციისგან თავისუფალი და ყველაფერი სიმართლე აღმოჩნდა,“ - ამბობს Sova-სთან ფლორიანი.

2018 წელს მან საქართველოში საკუთარი კომპანია დააარსა და ახლა უკვე მზად არის, ქვეყანაში საბოლოოდ ჩამოვიდეს საცხოვრებლად.

ვან დერ ბელენი მიიჩნევს, რომ დასავლეთ ევროპიდან ტურისტული ნაკადის გაზრდის მიუხედავად, საქართველოს შესახებ მსოფლიოში ჯერ კიდევ ბევრმა არ იცის.

„ევროპისთვის საქართველო ჯერ კიდევ ეგზოტიკაა,“ - მიიჩნევს ის.

პრეზიდენტის შვილს ტურიზმის სფეროში რამდენიმეწლიანი სამუშაო გამოცდილება აქვს. ფლორიანმა გადაწყვიტა, საკუთარი გამოცდილება საქართველოში გამოიყენოს. ვან დერ ბელენი, ასევე, ბიზნეს-კონსალტინგით არის დაკავებული - პოტენციურ ინვესტორებს საქართველოს შესაძლებლობების შესახებ უყვება.

„ყველას ვუყვები, როგორი ევროპული ქვეყანაა. ევროპელები ჯერ კიდევ ეგზოტიკურად მიიჩნევენ საქართველოს, თუმცა აქ ჩამოსულები ხვდებიან, რომ ეს ასე არ არის,“ - ამბობს ის Sova-სთან.

ვან დერ ბელენი ფიქრობს, რომ საკუთარი ქვეყნის ტურიტულ პოტენციალს სრულად თავად ქართველებიც ვერ იაზრებენ. მნიშვნელოვანი დარგები კი, სადაც ინვესტიციების განხორციელება შეიძლება, ფლორიანის აზრით, ენერგოსექტორი და ნარჩენების გადამუშავებაა.

მისი მამა, ავსტრიის პრეზიდენტი ალექსანდერ ვან დერ ბელენია, თანამდებობას ის 2016 წლიდან იკავებს.

იმის მიუხედავად, რომ პრეზიდენტიც და მისი შვილის ავსტრიაში დაიბადნენ, ოჯახის ფესვები ფსკოვშია, რუსეთში. ფლორიანის პაპა რუსი იყო, ბებია კი - ესტონელი. გერმანული გვარის გამო რეპრესიებს რომ გადარჩენილიყვნენ, საბჭოთა არმიას მეორე მსოფლიო ომის დროს გაექცნენ.

„პრეზიდენტობა მისი დამსახურებაა და არა ჩემი. ბევრი მეკითხება, როგორ შეიცვალა ჩემი ცხოვრება მას შემდეგ, რაც მამაჩემი ავსტრიის პრეზიდენტი გახდა. მე ვპასუხობ, რომ ფაქტობრივად, არ შეცვლილა. მხოლოდ ის შეიცვალა, რომ უფრო იშვიათად ვნახულობ მას, ვიდრე ადრე,“ - ჰყვება ფლორიანი.

ავსტრიის პრეზიდენტის შვილი იმედოვნებს, რომ შეძლებს, საკუთარი ბიზნესი მთლიანად საქართველოში გადმოიტანოს, რადგან მისთვის შორს ცხოვრება იმ ქვეყნისგან, რომელიც ძალიან შეუყვარდა, სულ უფრო რთული ხდება.

ფილმის "და ჩვენ ვიცეკვეთ" პირველი სეანსი დასრულდა - "ამირანიდან" გამოსული მაყურებლების მისამართით პიროტექნიკა ისროლეს

LIVE: "ამირანის" შესასვლელისკენ აქციის მონაწილეები ბოთლებს და სხვადასხვა საგანს ისვრიან

"სრულიად შემთხვევით გადამირჩა თვალი" - "ამირანთან" შეხლა-შემოხლის დროს ანა სუბელიანი დაშავდა