ის, რაც თრილერის მოყვარულებსა და პოტერჰედებს აერთიანებთ - ჯოან როულინგის ახალი თარგმანის პრეზენტაცია

28 მარტს, 19:00 საათზე „ბიბლუსი გალერეაში“ (თბილისი, კანდელაკის #7) რობერტ გელბრეითის ანუ ჯოან როულინგის ახალი წიგნის - „ბოროტების სამსახურში“ წარდგენა გაიმართება. წიგნს ტელეჟურნალისტი, მარიამ ჯანელიძე წარადგენს.

თრილერულ საღამოზე სტუმრები ჰარი პოტერის ავტორის კრიმინალურ მხარეს გაეცნობიან. გამომცემლობა „პალიტრა L-მა“ უკვე გამოსცა გელბრეითის „გუგულის ძახილი“ და „აბრეშუმის ჭია“, რომლებსაც ქართველი მკითხველის დიდი გამოხმაურება მოჰყვა. ღონისძიებაზე მწერალი და ტელეწამყვანი სანდრო ლორთქიფანიძე და მწერალი და სცენარისტი, ტორესა მოსი გელბრეითის ამ გამოცემებზეც ისაუბრებენ.

ქართველი მკითხველისთვის რობერტ გელბრეითი უკვე კარგად ცნობილი ავტორია და ფართო საზოგადოებისთვის ის ფაქტიც ცნობილია, რომ მწერალი დეტექტიურ სერიას ფსევდონიმით წერს. რობერტ გელბრეითი ლეგენდარული „ჰარი პოტერის“ ავტორის, ჯოან როულინგის ფსევდონიმია.

როულინგმა ტრილოგია მამაკაცის სახელით, რობერტ გელბრეითის ავტორობით გამოსცა. დიდ ბრიტანეთში ტრილოგიის პირველი ნაწილის გამოცემიდან ერთი წლის განმავლობაში არავინ იცოდა, რომ გელბრეითი ფსევდონიმია. მხოლოდ გარკვეული პერიოდის შემდეგ გახდა ცნობილი, რომ როულინგმა სრულიად სხვა ჟანრში სცადა ძალები და ეს საკმაოდ წარმატებით გამოუვიდა. აღნიშნულს ადასტურებს წიგნის გაყიდვების რაოდენობაც. ნაწარმოებმა პოპულარობა იმ პერიოდში მოიპოვა, ვიდრე მისი რეალური ავტორი გახდებოდა ცნობილი.

ლიტერატურულ საღამოზე მოსული სტუმრებისთვის „გუგულის ძახილი“, „აბრეშუმის ჭია“ და „ბოროტების სამსახურში“ 20%-იანი ფასდაკლებით გაიყიდება.

ღონისძიების ბმული: https://www.facebook.com/events/432028287605989/