რატომ შეუწყდა თბილისში 17 ათას აბონენტს ელექტროენერგია - "თელასის" განმარტება

მტკვრის მარჯვენა სანაპიროზე მიწის სამუშაოების წარმოების დროს დაზიანდა ძაბვის კაბელები, რის გამოც ელექტროენერგიის მიწოდება 17 ათას აბონენტს შეუწყდა. ამის შესახებ ინფორმაციას "თელასი" ავრცელებს.

მათი ინფორმაციით, მტკვრის მარჯვენა სანაპიროზე მიწის სამუშაოების წარმოების დროს გარე ორგანიზაციამ დააზიანა 35 კვ ძაბვის კაბელი, რომელიც დაკავშირებულია სს "თელასი"-ს ქვესადგურთან .

"კაბელის დაზიანების გამო 5 აპრილს 13:50 საათზე ელექტროენერგიის მიწოდება შეუწყდა საბურთალოს რაიონის 17 ათას აბონენტს.

მიუხედავად იმისა, რომ კაბელი არ არის "თელასი"-ს საკუთრებაში, კომპანიის ტექნიკურმა სამსახურმა ოპერატიულად აწარმოა აღდგენითი სამუშაოები და ელექტროენერგიის მიწოდება აბონენტებს 16:05 საათზე აღუდგა.

კომპანია მოუწოდებს ყველა ორგანიზაციას აწარმოონ მიწის სამუშაოები „თელასთან“ შეთანხმებით, რათა მსგავსი შემთხვევები არ გამეორდეს", - ნათქვამია ინფორმაციაში.