თუ ამ პაროლს იყენებთ, აუცილებლად უნდა შეცვალოთ - ბრიტანეთის კიბერუსაფრთხოების ცენტრის რჩევა

თუ პაროლად იყენებთ ციფრების კომბინაციას 123456, უმჯობესია, შეცვალოთ. CNN-ის ინფორმაციით, ამის შესახებ აღნიშნულია კვლევის დასკვნაში, რომლის ფარგლებში ინტერნეტში ყველაზე ადვილად გამოსაცნობი პაროლები შეისწავლეს.

ადვილად გამოსაცნობია, ასევე, ადამიანების და სპორტული გუნდების სახელები, სალანძღავი სიტყვები.

კვლევა დიდი ბრიტანეთის ეროვნულმა კიბერუსაფრთხოების ცენტრმა ჩაატარა. ირგანიზაციამ შეისწავლა მსოფლიოს მასშტაბით ის ანგარიშები, რომლებიც გატეხეს.

23.2 მილიონი ადამიანი პაროლად იყენებს კომბინაციას 123456, 7.7 მილიონი მომხმარებელი კი 123456789-ს. სამ მილიონზე მეტი ადამიანის პაროლები არის qwerty და password.

ლიდერების სიაშია საფეხბურთო გუნდების სახელები Liverpool, Chelsea, Arsenal და Manchester United.

კვლევის მიხედვით, მსოფლიოს მოსახლეობის უმეტესობა შემდეგ ათ პაროლს იყენებს :

1. 123456

2. 123456789

3. qwerty

4. password

5. 111111

6. 12345678

7. abc123

8. 1234567

9. password1

10. 12345

ოცეულში მოხვდა ისეთი „უცნაური“ სიტყვები, როგორიცაა monkey (მაიმუნი) და dragon (დრაკონი).

დიდი ბრიტანეთის კიბერუსაფრთხოების ეროვნული ცენტრი მომხმარებლებს მოუწოდებს, გამოიყენონ პაროლები, რომელიც არ შეიცავს მარტივად გამოსაცნობ ინფორმაციას - მაგალითად, სახელებს, ადგილობრივი საფეხბურთო კლუბის და საყვარელი ბრენდის დასახელებას.

„გირჩევთ, შეადგინოთ პაროლი სამი სხვადასხვა სიტყვისგან, რომელიც თქვენთვის მარტივად დასამახსოვრებელი იქნება,“ - ამბობს კიბერუსაფრთხოების ცენტრის ტექნიკური დირექტორი იან ლევი.