რძალმა, რომელმაც დედამთილს 5000 ლარი მოპარა, "დანაშაული მოინანია" - რას აცხადებენ პროკურატურაში

პროკურატურის ინფორმაციით, ახალგაზრდა ქალმა, რომელიც დედამთილისთვის ფულის მოპარვის ბრალდებით დააკავეს, თანხა დააბრუნა, „დანაშაული კი მოინანია“. როგორც „ინტერპრესნიუსს“ გენერალურ პროკურატურაში განუცხადეს, თანხა კვლავ ოჯახს დაუბრუნდება.

უწყების განმარტებით, დაკავებულმა ახალგაზრდა ქალმა დანაშაული მოინანია, რის გამოც მასთან საპროცესო შეთანხმება გაფორმდა და საქმე შეწყდა.

„საპროცესო შეთანხმება გაფორმდა და საქმე დაიხურა. დაზარალებული თავად დათანხმდა საპროცესო შეთანხმებას. ბრალდებულმა აღიარა და მოინანია დანაშაული.

შესაბამისად, სასამართლოს აღკვეთის ღონისძიებაზე აღარ უმსჯელია. თანხა ამოღებულია და დაზარალებულს სრულად დაუბრუნდება“, - განუცხადეს „ინტერპრესნიუსს“ გენერალურ პროკურატურაში.

საქმეზე სასამართლო სხდომა გუშინ გაიმართა. მოსამართლე დავით კეკენაძის გადაწყვეტილებით, ბრალდებულ ნინო ჭ-ს სასჯელის სახით 3-წლიანი გამოსაცდელი ვადა განესაზღვრა.

შემთხვევა ზუგდიდში რამდენიმე დღის წინ მოხდა. დედამთილის, ეთერ შენგელიას ინფორმაციით, მისმა 26 წლის რძალმა ჩანთიდან 5000 ლარამდე თანხა მოპარა. ქურდობის დროს, სახლში სამი წევრი იმყოფებოდა. რძალი მომხდარიდან რამდენიმე საათში დააკავეს.