რა მდგომარეობაშია ახალშობილი, რომელიც დედამ თხილის ბაღში დატოვა

ოზურგეთში თხილის ბაღში ნაპოვნი ახალშობილის ჯანმრთელობის მდგომარეობა სტაბილურია - ამის შესახებ AMBEBI.GE-ის აჭარის ჯანდაცვის მინისტრმა ზაალ მიქელაძემ განუცხადა.

მისივე ინფორმაციით, 4 დღის ჩვილი ამ დრომდე ბათუმის დედათა და ბავშვთა სამედიცინო ცენტრის ექიმების ინტენსიური მეთვალყურეობის ქვეშაა. მინისტრის თქმით, ახალშობილის ჯანმრთელობის გასაუმჯობესებლად ექიმები მაქსიმალურს აკეთებენ.

შეგახსენებთ, რომ ოზურგეთის ერთ-ერთ სოფელში, 16 აგვისტოს გამთენიისას სამართალდამცველებმა თხილის ბაღში მიტოვებული ახალშობილი იპოვეს. გოგონა რამდენიმე საათის დაბადებული იყო. როგორც პატრული ყვება, რომელმაც მეწყვილესთან ერთად იპოვა ახალშობილი, ჩვილი სიცივის გამო მთლიანად გაყინული იყო, სხეულზე კი ჭიპლარი ჰქონდა შემოხვეული.

მთავარ ფოტოზე ჩვილი გოგონა და პოლიციელი, რომელმაც ის გადაარჩინა