ავტორი:

"საკრებულოსთან მანქანის გაჩერებისთვის 5 ლარი გამომართვა" - "სტაიანშიკებით" შეწუხებული მძღოლების მიმართვა მერიას და კალაძის პასუხი

"საკრებულოსთან მანქანის გაჩერებისთვის 5 ლარი გამომართვა" - "სტაიანშიკებით" შეწუხებული მძღოლების მიმართვა მერიას და კალაძის პასუხი

წლებია, თბილისში აღარავის აკვირვებს ყოველ ფეხის ნაბიჯზე ზოლიანი ჯოხითა და შუქამრეკლი ჟილეტით მდგარი ე.წ. „სტაიანშიკები“, რომლებიც გაწეული მომსახურების სანაცვლოდ (რასაც ხშირ შემთხვევაში არავინ სთხოვთ), მძღოლებს თანხას ართმევენ.

დედაქალაქში სულ უფრო იზრდება იმ ადგილების რაოდენობა, სადაც გაჩერების საფასური 1 ლარიდან 5 ლარამდეც კი მერყეობს. უკვე, თითქმის, არცერთ „სტაიანშიკს“ აღარ ჰყოფნის 20-40 თეთრი, რასაც რიგ შემთხვევებში უცენზუროდაც აპროტესტებენ.

მძღოლების ნაწილი პროტესტის ნიშნად თანხას არ უხდის "სტაიანშიკებს" და თბილისის მერიასა და შინაგან საქმეთა სამინისტროს მათთან დაკავშირებით რეაგირებისკენ მოუწოდებს.

როგორც „ინტერპრესნიუსთან“ საუბარში რამდენიმე მძღოლმა განაცხადა, ე.წ. სტაიანშჩიკები ავტომანქანის პარკირებისას „სერიოზულ პრობლემებს უქმნიან“. მათი ინფორმაციით, ისინი ხურდა ფულს არ კმაყოფილდებიან და მძღოლებისგან გაცილებით მეტ თანხას ითხოვენ, რაც ხშირად კონფლიქტური სიტუაციის მიზეზი ხდება:

"ახმეტელის მეტროსთან, ხიზანიშვილის ქუჩაზე ე.წ. სტაიანშჩიკთან შელაპარაკებამ ისეთი მწვავე ხასიათი მიიღო, პატრულის გამოძახებასაც კი ვაპირებდი. ამ ტერიტორიაზე სპორტდარბაზში დავდივარ და კვირაში 3-ჯერ მაინც მიწევს მანქანის გაჩერება და როგორც წესი, ე.წ. სტაიანშჩიკებს 20 თეთრს ვაძლევ. როგორც ჩანს, დაიმახსოვრეს, რომ 20 თეთრის მეტს არ ვუხდი და მათთვის ამის გამო არასასურველი "კლიენტი" ვარ და გუშინ უკვე მანქანის გაჩერებაში სერიოზული პრობლემა შემიქმნეს.

პარკინგისთვის განსაზღვრული რამდენიმე ადგილი ცარიელი იყო, თუმცა ვერ ვაჩერებდი, რადგან ე.წ. სტაიანშჩიკებს მასზე ამკრძალავი საგზაო ნიშანი ჰქონდათ განთავსებული. როცა აღნიშნული საგზაო ნიშნის აღება ვთხოვე იმ არგუმენტით, რომ მქონდა მანქანის გაჩერების უფლება, ე.წ. სტაიანშჩიკი გაღიზიანდა. ავუხსენი, რომ არ ჰქონდა უფლება, არც ჩემთვის მანქანის გაჩერების აკრძალვის და ამის სანაცვლოდ არც კონკრეტული თანხის მოთხოვნის, თუმცა უშედეგოდ. საბოლოოდ, ეს ყველაფერი მწვავე კამათში გადაიზარდა.

პრობლემა ისაა, რომ ეს არ არის პირველი შემთხვევა, როცა ახმეტელის მეტროს მიმდებარე ტერიტორიაზე მყოფი ე.წ. სტაიანშჩიკები ასე იქცევიან. მე, როგორც მძღოლს უკვე სერიოზული დისკომფორტი მექმნება. არათუ ვთხოვ, მოვუწოდებ თბილისის მერიას და შინაგან საქმეთა სამინისტროს, რომ ეს პრობლემა მოაგვაროს და მოგვცეს მძღოლებს პარკინგისთვის განკუთვნილ ადგილებზე მანქანების თავისუფლად გაჩერების საშუალება. კონკრეტული რეგულაციების შემოღებაა საჭირო ან მინიმუმ ე.წ. სტაინშჩიკების ინფორმირება, რისი უფლება აქვთ და რისი - არა“, - განუცხადა „ინტერპრესნიუსს“ ერთ-ერთმა მძღოლმა.

ანალოგიურ პრობლემაზე საუბრობს კიდევ ერთი მძღოლი. მისი თქმით, ე.წ. სტაიანშჩიკმა მანქანის პარკირებაში, თბილისის საკრებულოს მიმდებარე ტერიტორიაზე 5 ლარი გამოართვა.

„თავისუფლების მოედანზე, მონუმენტის მიმდებარე ტერიტორიაზე მანქანის გაჩერება ხუთი ლარი დამიჯდა.

ე.წ. სტაიანშჩიკს, რომელიც მიმდებარე ტერიტორიაზე იდგა და მანქანის გასაჩერებელი ადგილი ჩაკეტილი ჰქონდა, რადგან მის უნებართვოდ ვერავინ შესულიყო, ვთხოვე გაეწია ბარიერი, რომ მანქანის გაჩერება შემძლებოდა. მან მანქანის გაჩერებისთვის 5 ლარი მთხოვა და მითხრა, რომ 2 საათით შემეძლო გაჩერება. როდესაც ვკითხე, რატომ უნდა გადამეხადა აღნიშნული თანხა, მითხრა, რომ ამ ადგილზე გაჩერება ასე ღირს. საბოლოოდ, იძულებული გავხდი 5 ლარი მიმეცა, რადგან ვერც სხვა ადგილი ვიპოვე და თან ძალიან მეჩქარებოდა“, - აღნიშნა მძღოლმა.

მანქანის პარკირებაში პრობლემების შექმნისა და თანხის მოთხოვნის გარდა, სხვა პრობლემაზე მიუთითებს კიდევ ერთი მძღოლი, რომლის ინფორმაციითაც, ე.წ. სტაინშჩიკი „ჯარიმებს უმალავდა“.

„მოგეხსენებათ, თბილისში პარკინგის პრობლემა მუდმივად დგას და ეს განსაკუთრებით ცენტრალურ უბნებს ეხება. სწორედ ამიტომ ვაკეში ერთ-ერთ ქუჩაზე ე.წ სტაიანშჩიკის დახმარებით ავტომობილს სისტემატურად ერთი და იგივე ადგილზე ვაჩერებდი. იმ ადგილზე არ იყო აკრძალვის ნიშანი, თუმცა არც საპარკინგე ადგილი იყო მონიშნული.

ე.წ. სტაინშჩიკის მტკიცებით, აღნიშნულ ადგილზე გაჩერება პრობლემას არ წარმოადგენდა და იქ მერიის შესაბამისი სამსახურის წარმომადგენლები შემოწმებას არ ახდენდნენ. როგორც რამდენიმე თვის შემდეგ აღმოჩნდა, არასწორი პარკირებისთვის სისტემატურად მაჯარიმებდნენ, „სტაიანშჩიკი“ კი ჩემს ჯარიმებს ყრიდა. რა თქმა უნდა, მანქანის გაჩერებისას მას ფულსაც ყოველთვის ვუხდიდი“, - განაცხადა ვაკის ერთ-ერთმა მცხოვრებმა „ინტერპრესნიუსთან“ საუბრისას.

კიდევ ერთი მძღოლის თქმით კი, ე.წ. სტაიანშჩიკებთან მუდმივად კონფლიქტური სიტუაცია აქვს.

„ბავშვები წავიყვანე კინო „რუსთაველში“. გუდიაშვილზე, ეროვნულ ბიბლიოთეკასთან მანქანა პარკინგისთვის დახაზულ ზოლში გავაჩერე, როცა ე.წ. სტაინშჩიკი მოვიდა და მითხრა, რომ 2 ლარი უნდა გადამეხადა, თან წინასწარ. ზოგადად, ვაძლევ ხოლმე ხან 20 თეთრს, ხან 50 თეთრსაც, როცა გაჩერებაში ან მანქანის გამოყვანაში მეხმარებიან, მაგრამ იმდენად გავღიზიანდი, რომ თვითონ მომთხოვა თანხა და თან მის მიერვე დაწესებული ტარიფი, რომ სერიოზული ჩხუბი მოგვივიდა. საბოლოოდ, არც 2 ლარი და 20 თეთრიც კი არ გადავუხადე.

ვფიქრობ, ამ ხალხის უკან კონკრეტული ადამიანები დგანან, რომელთა ჯიბეშიც მიდის ჩვენს მიერ ე.წ. სტაიანშჩიკებისთვის გადახდილი თანხები. ამით შინაგან საქმეთა სამინისტრო უნდა დაინტერესდეს. საქმეში აუცილებლად უნდა ჩაერთოს მერია. მე პირადად არ ვაპირებ ე.წ. სტაიანშჩიკების უმსგავსოებასთან შეგუებას. ვიჩხუბებ იქამდე, ვიდრე შესაბამისი სახელმწიფო უწყებები ამ პრობლემის მოგვარებას არ დაიწყებენ. ასე გაგრძელება წარმოუდგენელია“, - აღნიშნა სააგენტოსთან საუბრისას ერთ-ერთმა მძღოლმა.

აპირებს თუ არა მერია, თბილისელ მძღოლებს აღნიშნული პრობლემა მოუგვაროს, მით უმეტეს მაშინ, როცა მძღოლები პარკირებისთვის დაწესებულ ყოველთვიურ საფასურს ისედაც იხდიან. ამ კითხვით "ინტერპრესნიუსმა" თბილისის მერს მიმართა. კახა კალაძე მძღოლებს ურჩევს, ე.წ. სტაიანშჩიკების მხრიდან პრობლემების შექმნის შემთხვევაში, საპატრულო პოლიცია გამოიძახონ.

"მარტივი ქმედებაა განსახორციელებელი - თუ ასეთი რამ ხდება, ეს არის დანაშაული. ვინც ასეთ სიტუაციაში ხვდება, უნდა აიღოს ტელეფონი და მიმართოს შესაბამის უწყებას, შინაგან საქმეთა სამინისტროს და მოხდება რეაგირება. "სტაიანშჩიკები" არ ექვემდებარებიან არავის. კეთილი ნებაა ადამიანების, თუ უნდათ ფულს გადაუხდიან, თუ უნდათ - არ გადაუხდიან. ეს არის ელემენტარული. არავის აქვს უფლება მძღოლს კონკრეტული თანხა მოსთხოვოს. ეს არის დანაშაული და მოქალაქეებს შეუძლიათ მიმართონ შესაბამის სამსახურებს",- განაცხადა კალაძემ.

"პირველი 15 წუთი არის უფასო, შემდეგ კი..."  - 10 სექტემბრიდან პეკინის გამზირსა და მიმდებარე ქუჩებზე ზონალურ-საათობრივი პარკირების წესი ამოქმედდება

"ბათუმის ბულვარში კარვები დაიდგმება და ადამიანებს შევთავაზებთ ნებაყოფლობით ტესტირებას" - ამირან გამყრელიძე

ტურისტულ რეგიონებში კაფე-ბარების, რესტორნების და სასტუმროების პერსონალს ინტენსიური ტესტირება ჩაუტარდება