ქართველი ფეხბურთელი, რომელმაც სიმსივნე დაამარცხა - "დღეს საუკეთესო დღეა! ერთწლიანი რთული პერიოდი დამარცხებულია!"

სპორტული გამოცემა "ლელო" სასიხარულო ამბის შესახებ წერს - თბილისის "ლოკომოტივის" ფეხბურთელმა, თავდამსხმელმა მამია გავაშელიშვილმა სიმსივნე დაამარცხა და მალე მოედანს დაუბრუნდება.

სპორტსმენს დაავადება ერთი წლის წინ დაუდგინეს და ამ ხნის განმავლობაში მას თამაშისთვის თავის დანებება მოუხდა, რათა მთლიანად მკურნალობაზე გადართულიყო.

ერთწლიანი რთული პეროდის დასრულების შესახებ "ფეისბუქზე" ემოციური პოსტი გამოაქვეყნა ფეხბურთელის მეუღლემ, მოცეკვავე ანუნა იაშვილმა. ახლადდაქორწინებულ წყვილს ერთი წლის ვაჟი ჰყავს.

"დღეს საუკეთესო დღეა ჩემსა და მამიას ცხოვრებაში! ერთწლიანი რთული პერიოდი დამარცხებულია! მამია სრულიად გამოჯანმრთელებულია და სულ მალე ვარჯიშზე შეუერთდება გუნდს.

ამ სიხარულისთვის კი ძალიან დიდი მადლობა მინდა გადავუხადო კლუბ თბილისის "ლოკომოტივს" - თქვენი თანადგომის გარეშე ვერაფერს მივაღწევდით!

საუკეთესო თანამშრომლებითა და ფეხბურთელებით დაკომპლექტებული გუნდი, რომელიც ყოველთვის და ყველგან ჩვენს გვერდით იდგა! მჯერა, რომ ძალიან დიდ წარმატებას მიაღწევთ!

აქვე, დიდი მადლობა მინდა გადავუხადო საქართველოს ფეხბურთის ფედერაციას, საქართველოს ნაკრების ფეხბურთელებს, ეროვნული ლიგის გუნდებსა და მოთამაშებს! კიდევ ერთხელ დავრწმუნდი, რომ ფეხბურთი საუკეთესო სპორტი და საუკეთესო ადამიანების სპორტია" - წერს ანუნა იაშვილი.

მამია გავაშელიშვილი "ლოკომოტივის" ერთ-ერთი საუკეთესო მოთამაშეა და ეროვნულ ლიგა 2-ში გატანილი გოლებით რეკორდსმენია.

2014-15 წლების სეზონში (პლეი აუტების ჩათვლით) მან 47 გოლი გაიტანა. 24 წლის თავდამსხმელმა ამ სეზონისთვის მზადება "ლოკომოტივთან" დაიწყო, მაგრამ იანვარში მძიმე დიაგნოზი დაუსვეს და მას შემდეგ თურქეთში მკურნალობდა წაიკითხეთ ვრცლად