ვარკეთილში, მე-9 სართულიდან გადავარდნილი 16 წლის ბიჭის მიმართ ჯგუფურად ჩადენილი ძარცვის ბრალდებით დაკავებული 4 პირი კვლავ პატიმრობაში დარჩა

ვარკეთილში, მე-9 სართულიდან გადავარდნილი 16 წლის ბიჭის მიმართ ჯგუფურად ჩადენილი ძარცვის ბრალდებით დაკავებული 4 პირი კვლავ პატიმრობაში დარჩა. დღევანდელ სასამართლო სხდომაზე ბრალდებულების მიმართ შეფარდებული აღკვეთის ღონისძიების - პატიმრობის გადასინჯვაზე, ასევე მტკიცებულებების დასაშვებობასთან დაკავშირებით იმსჯელეს.

ერთ-ერთი დაკავებულის, გიორგი შამბეშოვის ადვოკატის, ლაშა ტყეშელაძის განცხადებით, სასამართლომ პროკურატურის მიერ წარდგენილი მტკიცებულებების ნაწილი დაუშვებლად სცნო.

"ბრალდების მხარის მიერ წარმოდგენილი მტკიცებულებები სასამართლომ დაუშვებლად სცნო, რაც იმას ნიშნავს, რომ მტკიცებულებების ფარგლებში სამართლიანად ჩატარებული არ იყო გამოძიება. ვიმედოვნებ, ამ სასამართლოში აუცილებლად დადგება გიორგი შამბეშოვის მიმართ გამამართლებელი განაჩენი", - განაცხადა ტყეშელაძემ.

საქმის პროკურორის თორნიკე ტყაბლაძის განმარტებით კი, სასამართლომ 4-ტომიანი საქმიდან დაუშვებლად მხოლოდ ორი მტკიცებულება სცნო.

"ბრალდების მხარის მიერ წარდგენილი მტკიცებულები 4-ტომიან საქმეზე მხოლოდ ორი მტკიცებულება იქნა დაუშვებლად ცნობილი. ეს გახლავთ, მობილური ტელეფონის დათვალიერების ოქმი და სერვისების სააგენტოს პასუხი წერილზე", - განაცხადა ტყაბლაძემ.

სასამართლოს შემდეგი სხდომა 13 ნოემბერს, 12:00 საათზე გაიმართება.