ავტორი:

ვინ მიაწოდა ბინ ლადენს 11 სექტემბრის ტერაქტის იდეა

ვინ მიაწოდა ბინ ლადენს 11 სექტემბრის ტერაქტის იდეა

ცნობილია, ტერორისტთა წრეებში როგორ მომწიფდა 2001 წლის 11 სექტემბრის ტერაქტის იდეა. პაკისტანელმა ხალიდ შეიხ მოჰამედმა, რომლის ანგარიშზე მრავალი სისხლიანი აქციაა, "ალ ქაიდას" მეთაურ ბინ ლადენს 1996 წელს ავღანეთში ჩააკითხა და შესთავაზა ათი თვითმფრინავის ერთდროულად გატაცება და აშშ-ში ცნობილი სამოქალაქო სამიზნეებისთვის დაჯახება.

ბინ ლადენმა ჩანაფიქრი განუხორციელებლად მიიჩნია და დაიწუნა, თუმცა სამი წლის შემდეგ გადაიფიქრა და მოჰამედი ყანდაღარში მიიწვია ამ გეგმის მცირემასშტაბიანი ვერსიის შესამუშავებლად. სწორედ ამგვარად დაიგეგმა 2001 წლის 11 სექტემბრის ტერაქტი...

ხალიდ შეიხ მოჰამედი

სანამ ტერორისტი გახდებოდა, “წინა ცხოვრებაში” ხალიდ შეიხ მოჰამედმა აშშ-ში ჩრდილოეთ კაროლინის სასოფლო-სამეურნეო და ტექნოლოგიური უნივერსიტეტი დაამთავრა. სავსებით შესაძლებელია, თვითმფრინავების ცათამბჯენებისთვის შეჯახების იდეა სწორედ 1945 წლის ინციდენტიდან განევითარებინა...

1945 წლის 28 ივლისს დილის 9 საათსა და 40 წუთზე, სქელ ნისლში, ბომბდამშენი B-25 “მიტჩელი” ნიუ-იორკის ცათამბჯენ "ემპაიერ სტეიტ ბილდინგს" დაეჯახა. შეჯახება მოხდა 78-ე და მე-80 სართულებს შორის, სადაც ეროვნული კათოლიკური საბჭოს ოფისები იყო განლაგებული. ავარიის შედეგად შენობაში გაჩნდა 5,5X6,1 მეტრი ზომის ხვრელი. შენობის სტრუქტურული მთლიანობა შეჯახებას არ დაურღვევია, თუმცა დაიღუპა 14 ადამიანი - ეკიპაჟის 3 წევრი და 11 შენობაში მყოფი.

ერთ-ერთმა ძრავამ გამჭოლად გაიარა ცათამბჯენში, გახვრიტა მოპირდაპირე კედელი, იფრინა კიდევ 270 მეტრი და ახლომდებარე შენობას დაეცა, სადაც ცეცხლში განადგურდა პენტჰაუსში განლაგებული სამხატვრო სტუდია. მეორე ძრავა და შასის ნაწილი ლიფტის შახტში ჩაცვივდა. წარმოქმნილი ხანძარი 40 წუთში ჩააქრეს - ეს ერთადერთი ხანძარია ასეთ სიმაღლეზე, რომლის გაკონტროლებაც მოხერხდა.

პილოტ უილიამ სმითის ნეშტი მხოლოდ ორი დღის შემდეგ იპოვეს ლიფტის შახტის ფსკერზე. შენობის დაზიანებისა და მსხვერპლის მიუხედავად, "ემპაიერ სტეიტ ბილდინგი" მომდევნო ორშაბათს გაიხსნა.

სხვათა შორის, 1960-იან წლებში, როცა პროექტდებოდა მსოფლიოს სავაჭრო ცენტრის ტყუპი ცათამბჯენი, ამ ინციდენტის გათვალისწინებით განიხილეს სცენარი, თუ ერთ-ერთ შენობას შემთხვევით ბოინგი-707 შეეჯახებოდა. თუმცა, 2001 წელს ტყუპი ცათამბჯენი ბოინგ-767-მა იმსხვერპლა...

P.S. ცათამბჯენზე კიდევ ერთი შეჯახება 2006 წლის 11 ოქტომბერს, საღამოს 18:42 საათზე მოხდა - ნიუ-იორკში, მანჰეტენის უბან ზემო ისტ-საიდში ერთძრავიანი მსუბუქი თვითმფრინავი (Cirrus SR20) მრავალბინიანი ცათამბჯენის (Belaire) ჩრდილოეთ მხარეს შეეჯახა.

მრავალბინიან ცათამბჯენს პატარა თვითმფრინავი 2006 წელსაც დაეჯახა

დაიღუპა ეკიპაჟის ორივე წევრი და კიდევ 21 ადამიანი დაშავდა. რამდენიმე ბინაში წარმოქმნილი ხანძარი ორ საათში ჩააქრეს. მიზეზი პილოტის შეცდომა გახდა, თუმცა კომისიამ ვერ დაადგინა, ვინ იჯდა საჭესთან - თვითმფრინავის მფლობელი, “ნიუ-იორკ იანკიზის” ფეხბურთელი კორი ლიდლი თუ მისი სერტიფიცირებული მფრინავი-ინსტრუქტორი ტაილერ სტენჯერი...

მომზადებულია CNN-ის მიხედვით;