ექიმი ჯაბა ზარქუა პაციენტებს  რუსთაველზე, აქციის მიმდინარეობისას მიიღებს : "კონსულტაციის საფასურია სოლიდარობა!"

გასტროენტეროლოგი ჯაბა ზარქუა, რომელიც ამავე დროს პარლამენტის წინ მიმდინარე აქციის ერთ-ერთი მონაწილეა, პაციენტებს მიღებას რუსთაველის გამზირზე სთავაზობს. ზატქუამ სტატუსი „ფეისბუქზე“ დაწერა.

„მოკლედ, ბოდიში ჩემს პაციენტებს, რომლებსაც გუშინ ვიზიტი გავუუქმე და დანარჩენებს გადავუდე. მაწუხებს ეს ამბავი და ერთი იდეა ამეკვიატა, რომელსაც გავაკეთებ დღეს და თუ კოლეგები ამყვებით გზადაგზა, უმშვენიერესი იქნება.

ვაპირებ გასტროენტეროლოგის კარვის დადგმას რუსთაველზე. ცხადია 24 საათი კარავში ვერ ვიჯდები, იმიტომ, რომ აქციის ორგანიზატორიც ვარ, მაგრამ ზედ დავაკრავ, როდის იქნება მიღების საათები და მივიღებ ყველა პაციენტს, რომელსაც ღვიძლისა და კუჭ-ნაწლავის პრობლემები აწუხებს.

კონსულტაციის საფასურია სოლიდარობა!

პ.ს. მართლა ჩვეულებრივი კონსულტაცია მექნება, ოღონდ არაჩვეულებრივ პირობებში, ბლანკებიც კი მომაქვს რომ მცირე ჩანაწერებიც გავუკეთო პაციენტებს. ნუ, ფორმა-100-ებს ნუ მომთხოვთ ერთი. საქმე საქმეში!ყველა რუსთაველზე!“ - წერს ზარქუა.

რუსთაველის გამზირზე, პარლამენტის შენობის წინ საპროტესტო აქცია მიმდინარეობს. აქტივისტებმა განაცხადეს, რომ ისინი იქამდე გამართავენ აქციებს, ვიდრე არ ექნებათ გარანტია, რომ არჩევნები პროპორციული წესით ჩატარდება.