ავტორი:

რატომ ჩადიან ქართველი პოლიტიკოსები რუსეთში?

რატომ ჩადიან ქართველი პოლიტიკოსები რუსეთში?

დეოკუპაციის გასაღები თუ მხარდამჭერების ძებნა - რისთვის ჩადიან ქართველი პოლიტიკოსები ჩრდილოელ მეზობელთან?! ეს კითხვები აქტიური მას შემდეგ გახდა, რაც "დემოკრატიული მოძრაობის" ლიდერი ნინო ბურჯანაძე, პარტიის პოლიტსაბჭოს წევრთან, საკუთარ ვაჟ - ანზორ ბიწაძესთან ერთად, მოსკოვში გაემგზავრა.

"ფეისბუქზე" გავრცელდა თვითმფრინავის ბილეთის ფოტოც - 2 დეკემბრის რეისი თბილისი-ერევანი-მოსკოვის მიმართულებით, რომელიც გრიგოლ ვაშაძის სახელზეა, თუმცა ვაშაძე მოსკოვში გაფრენას კატეგორიულად უარყოფს.

იმაზე, რომ შესაძლოა ბურჯანაძესთან ერთად მოსკოვში ვაშაძეც წასულიყო, მინიშნება გააკეთა საპარლამენტო უმრავლესობის ლიდერმა მამუკა მდინარაძემ: "გრიგოლ ვაშაძე მოიკითხეთ? ხომ არ არის ბურჯანაძესთან ერთად? იმიტომ, რომ აქაც აბსოლუტურად ლოგიკური იქნებოდა კიდევ უფრო ყველაფერი". თუმცა, თავად "ნაციონალური მოძრაობის" ლიდერმა ეს კატეგორიულად უარყო: "ჩაჯექით მანქანაში და მობრძანდით ჩემთან. შეამოწმეთ, აქ ვარ თუ არა. მამუკა მდინარაძეს კი ჩემგან გადაეცით, რომ მოიკითხა რუსეთის ადმინისტრაციის ყველა წარმომადგენელმა" - განაცხადა ვაშაძემ ჟურნალისტებთან.

ასეა თუ ისე, პოლიტიკური კრიზისის ფონზე მოლაპარაკებებში აქტიურად ჩართული ერთ-ერთი ოპოზიციონერი ლიდერის "მტრის სახლში" ვიზიტმა, ოპოზიციაში მცირე გაურკვევლობა გამოიწვია, ხელისუფლება კი ხუმრობის ხასიათზე დააყენა. მაგალითად, „ქართული ოცნების“ გენერალურმა მდივანმა, თბილისის მერმა კახა კალაძემ, ბურჯანაძის ვიზიტზე კომენტირებისას განაცხადა, "გერმანული მოდელის“ ჩამოსატანად არის წასული და დაველოდოთო...

პარტია "კანონი და სამართალის" ლიდერი თაკო ჩარკვიანი ბურჯანაძესთან ერთად ოპოზიციურ ფორმატში მონაწილეობას აღარ აპირებს, თუმცა, პროპორციულ სისტემაზე გადასვლას კვლავინდებურად ითხოვს.

"მე რუსული ორიენტაციის პარტიების რეაბილიტაციისთვის არსად არ დავჯდები. მე თუ სადმე დავჯექი, მხოლოდ იმისთვის, რომ პროპორციული არჩევნები, საარჩევნო გარემო იყოს. ვრჩები პროპორციული არჩევნების მოთხოვნის ერთ-ერთ ფლაგმანად! მომწონს გერმანული მოდელი, რომელზეც ყველამ ერთად ვიმუშავეთ. ამასთან, პიკეტირების მომხრედ ვრჩები. ყველა აქციის მონაწილედ ვრჩები.

არ ვაპირებ იქ, სადაც იქნება პუტინთან ანგარიშის ჩამბარებელი ბურჯანაძე, გადაწყვეტილებები მივიღო და ჩემი ხალხი მოვატყუო", - განაცხადა ჩარკვიანმა.

"შენების მოძრაობის" ლიდერის დავით უსუფაშვილის განცხადებით კი, ოპოზიცია ერთიანია სამართლიანი არჩევნების მოთხოვნის საკითხში და სხვა საკითხებში განსხვავებულობამ, მათ საერთო მიზანსა და ამოცანას ხელი არ უნდა შეუშალოს.

"ქალბატონმა ნინომ იცის ჩემი მოსაზრება იმის თაობაზე, რომ მე ამ ვიზიტებს შედეგიანად და საჭიროდ არ ვთვლი. არც ადრე ვთვლიდი და არც ახლა. როდესაც მან თქვა, რომ წასვლას აპირებდა, ჩემი აზრი მოვახსენე, მაგრამ როგორც ადრე, არავის და ვერავის დავიჭერდი, საკუთარი პასუხისმგებლობით ნაბიჯების გადადგმას წინააღმდეგობას ვერ გავუწევდი და არც ახლა ვთვლი, რომ სწორია ერთმანეთს რაიმე შეზღუდვები დავუწესოთ.

მთავარია, რომ პროპორციული, სამართლიანი არჩევნების მოთხოვნაში ერთიანი ვართ. ყველა პოლიტიკური ძალა და პარტია, პარალელურ რეჟიმში თავისი შეხედულებისამებრ აგრძელებს პოლიტიკური ნაბიჯების გადადგმას, აქცენტს აკეთებს იმ თემებზე, რომელზეც ადრე აკეთებდა, დადის იმ ქვეყნებში, სადაც დადიოდა. ამიტომ, მე არ მგონია, რომ ამ ფაქტისგან რაიმე დაბრკოლება უნდა შევქმნათ სამართლიანი არჩევნების მოთხოვნაში ჩვენი ერთობის გზაზე.

ვაკონკრეტებ, პრობლემას ვერ ვხედავ, სამართლიანი არჩევნების მოთხოვნა-მიღწევის გზაზე ერთად მსხდომი პარტიების ლიდერები ხვალ რომელი მიმართულებით გაფრინდებიან თბილისიდან და საიდან ჩამოფრინდებიან ზეგინდელ შეხვედრაზე.

მე არ ვთვლი, რომ ნინო ბურჯანაძის მოსკოვში გაფრენა ან მანამდე შალვა ნათელაშვილის ვაშინგტონში გაფრენა ან ვიღაცის არსად გაფრენა და ზუგდიდში ჩასვლა, რაიმე პრობლემას ქმნის“, - განაცხადა დავით უსუფაშვილმა.

თუმცა, ოპოზიციისგან განსხვავებით, ამაში პრობლემას ხედავს "ქართული ოცნება". იურიდიულ საკითხთა კომიტეტის თავმჯდომარე ანრი ოხანაშვილის თქმით, ოპოზიცია, რომელიც მოლაპარაკების მაგიდასთან ზის, ნინო ბურჯანაძის ოკუპანტ ქვეყანაში ვიზიტს ამართლებს.

"ფაქტია, რომ ვენეციის კომისია შეცვალეს კრემლით, რათა მასთან შეათანხმონ, როგორც "ნაციონალური მოძრაობის“ ე.წ. პროექტი, ასევე მათი სამოქმედო გეგმები. ყველა ქმედებაში იკვეთება მათი რეალური მიზანი - ხელისუფლების დამხობა" - განაცხადა ოხანაშვილმა.

სხვადასხვა დროს, ბურჯანაძის გარდა, მოსკოვში ვიზიტები ჰქონდათ - "პატრიოტთა ალიანსის" წევრებს, "ქართული დასის" ლიდერს ჯონდი ბაღათურიასა და „თავისუფალი საქართველოს“ თავმჯდომარე კახა კუკავას. იმაზე, თუ რატომ ჩადიან ქართველი პოლიტიკოსები რუსეთში, პოლიტოლოგები ამბობენ, რომ ოპოზიციის ლიდერები ოკუპანტ მეზობელთან მხარდაჭერას ეძებენ. პოლიტოლოგთა ნაწილი ამას ამართლებს, ნაწილი - აკრიტიკებს.

გია ხუხაშვილის აზრით, ბურჯანაძის პოზიცია ოპოზიციას ვერ დაზიანებს:

"არანაირი ოპოზიციის ერთიანობა არ არსებობს, და არც უნდა იყოს, არ იქნება სწორი. პარტიებს შორის მსოფლმხედველობრივი სხვაობებია. რასაც ვუყურებთ ეს ერთიანობა კი არ არის, ეს არის თემატური თანამშრომლობა იმ პროტესტზე, რასაც ჰქვია ხელისუფლების მხრიდან "გადაგდებული" საზოგადოების პოზიცია. შესაბამისად ის, რომ ამ ერთ საკითხში პარტიები ახერხებენ თანამშრმლობას არ ნიშნავს, რომ ოპოზიცია ერთიანია.

ბურჯანაძე რა სეგმენტზეც მუშაობდა, იგივეს აგრძელებს და მისი მოსკოვში ჩასვლით ახალი არაფერი მომხდარა. იმის თქმა, რომ ბურჯანაძე, რაღაც პოლიტიკას ატარებს და ეს ოპოზიციას დააზიანებს, არასწორია.

საქართველოში არის პოლიტიკოსთა სეგმენტი, რომელიც ფიქრობს, რომ პრობლემების გადაწყვეტის გასაღები მოსკოვშია. აქვთ ილუზია, რომ რუსეთთან ამ ტიპის ურთიერთობებით შეიძლება რაღაც პრობლემები გადაწყვიტონ. ამ პოლიტიკურ სეგმენტს, ქვეყანაში ჰყავს თავის პოლიტიკური შემსრულებელი. არ არის ძალიან დიდი სეგმენტი, მაგრამ არსებობენ და ვიღაც პოლიტიკოსი ამ მოთხონას ემსახურება“ - გვითხრა ხუხაშვილმა.

"ბურჯანაძე ხომ პირველად არ მიდის მოკოვში?! ეს იცოდა ყველამ და სიახლეს არავისთვის წარმოადგენს. ამ კონკრეტულ შემთხვევაში კი, ოპოზიცია გაერთიანებულია საარჩევნო სისტემასთან და არა ბლოკებთან დაკავშირებით. საარჩევნო სისტემა კი ინტერესთა თანხვედრაა, მეტი არაფერი.

რაც შეეხება იმას, უნდა წავიდეს თუ არა ბურჯანაძე მოსკოვში ან რომელიმე პოლიტიკოსი - სანამ ჩვენ ვლაპარაკობთ, რომ რუსეთი არის ოკუპანტი ქვეყანა, სანამ ამას ვიზიარებთ, არ ვთვლი, რომ მოსკოვში უნდა ვიაროთ.

რუსეთში ჩასვლა არის ხელისუფლების პრეროგატივა, სანამ რუსეთს ჩვენი ტერიტორიები აქვს ოკუპირებული. ოპოზიციის სიარული კი, როგორი კარგი და კეთილშობილური მიზნებიც არ უნდა ჰქონდეს, არ არის გამართლებული. მოსკოვში დადიან მხარდაჭერის მისაღებად, თუმცა მე ამას არ ვეთანხმები" - განუცხადა AMBEBI.GE-ს ვახტანგ ძაბირაძემ.

პოლიტოლოგი ვაჟა ბერიძე კი ქართველი პოლიტიკოსების მოსკოვში ვიზიტში პრობლემას ვერ ხედავს და თვლის, რომ ცალკეული ოპოზიციონერის ჩასვლა რუსეთში, დანარჩენ ოპოზიციას ვერ ავნებს:

"ყველა პოლიტიკოსს აქვს ხედვა, ქვეყნის წინაშე მდგარი პრობლემები რა გზით მოაგვაროს. ვიღაცას მიაჩნია, რომ სტრატეგიულ პარტნიორებს უნდა ველაპარაკოთ, ვიღაცას მიაჩნია, რომ რუსეთსაც უნდა ველაპარაკოთ. ბურჯანაძე იმ პოლიტიკოსების რიცხვს ეკუთვნის, ვინც თვლის, რომ რუსეთთან დიალოგია საჭირო ოკუპაციის პრობლემების მოსაგვარებლად.

რა თქმა უნდა, ხელისუფლება, ამას მთლიანად ოპოზიციის დისკრედიტაციისთვის გამოიყენებს, თუმცა ვთვლი, რომ გაერთიანებული ოპოზიცია არ არსებობს. ეს გაერთიანება თემატურია პროპორციულ არჩევნებთან დაკავშირებით, ამიტომ ბურჯანაძე წავა თუ არა მოსკოვში, არ აზიანებს მაგალითად, "ევროპული საქართველოს" იმიჯს.

რუსეთი ერევა ამერიკის პრეზიდენტის არჩევნებში და ეს დაივიწყო, სირაქლემასავით ჩარგო თავი და იძახო - არ დაველაპარაკებიო, არ გამოვა. ვიღაცა უნდა ელაპარაკოს. ე.წ პროდასავლური ძალები არ ელაპარაკებიან, ხელისუფლება მათი შიშით ვერ ელაპარაკება და ბურჯანაძე თვლის, რომ უნდა ელაპარაკოს რუსეთს, მოძებნოს ოკუპაციის გადასაწყვეტი გასაღები.

იმას რომ, პროდასავლურ ძალებს ფარული ალიანსებით მართავდეს რუსეთი, ჯობია, რომელიღაც პოლიტიკური ძალა და ლიდერი ღიად ელაპარაკოს რუსეთს და ვიცოდეთ, რაზე ლაპარაკობენ“, - გვითხრა ბერიძემ.

რა შეგედით დასრულდა ხელისუფლებისა და ოპოზიციის შეხვედრის მეორე რაუნდი

იგეგმება თუ არა საქართველოში რუსული ენის და კულტურის ცენტრის გახსნა - არჩილ თალაკვაძის კომენტარი

არჩილ თალაკვაძე - უკვე არის ნიშნები, რომ ვუბრუნდებით ნორმალურ პოლიტიკურ პროცესს