15 წლის მოზარდის საქმეზე ორ პოლიციელს უფლებამოსილება შეუჩერდა - შსს-ს განცხადება
შინაგან საქმეთა სამინისტროს ინფორმაციით 15 წლის მოზარდის საქმეზე, რომელმაც პოლიციის განყოფილებაში დაკითხვის შემდეგ თვითმკვლელობა სცადა, ორ სამართალდამცველს უფლებამოსილება შეუჩერდა.
უწყების ინფორმაციით, პოლიციელებმა აღნიშნული თავად მოითხოვეს:
"თბილისის "მწვანე სკოლაში" მომხდარ ფაქტსა და შემდგომ განვითარებულ მოვლენებზე მიმდინარე გამოძიების დასრულებამდე შინაგან საქმეთა სამინისტროს თბილისის პოლიციის დეპარტამენტის დიდუბე-ჩუღურეთის სამმართველოს I განყოფილების უფროსის მოადგილეს და ამავე განყოფილების გამომძიებელს, მათივე ინიციატივით, შეუჩერდათ უფლებამოსილება.
საგამოძიებო ღონისძიებებს სახელმწიფო ინსპექტორის სამსახური ატარებს. შინაგან საქმეთა სამინისტროდან სახელმწიფო ინსპექტორის სამსახურს უკვე გადაეგზავნა მოთხოვნილი მასალები. სამინისტრო ინსპექტორის სამსახურთან პროაქტიურ თანამშრომლობას განაგრძობს" - ნათქვამია შსს-ს განცხადებაში.
15 წლის ბავშვის, რომელმაც რამდენიმე დღის წინ თვითმკვლელობა სცადა, სასიცოცხლო მაჩვენებლების დინამიკაში მცირე გაუმჯობესება აღინიშნება. იაშვილის სახელობის ბავშვთა ცენტრალურ საავადმყოფოში აცხადებენ, რომ მოზარდის ჯანმრთელობის მდგობარეობა კვლავ სტაბილურად მძიმეა და ის მართვით სუნთქვაზეა.
15 წლის მოზარდის საქმეზე დაკავებული გამომძიებელი საავადმყოფოში გადაიყვანეს
15 წლის მოზარდის მიმართ ჩვენების იძულების ფაქტზე გამომძიებელი დააკავეს
