მკვლელობა ვარკეთილის სასაფლაოზე - 24 წლის ახალგაზრდის სასტიკ წამებაში ოჯახი სპეცრაზმელებს ადანაშაულებს

"მთავარი არხის" ინფორმაციით, 2 იანვარს, ორმა სპეცრაზმელმა 24 წლის მურად წურწუმია ვარკეთილის სასაფლაოზე წამებით მოკლეს. ტელეკომპანიის ინფორმაციით, წურწუმია ძმასთან ერთად მამის სასაფლაოზე იმყოფებოდა, რა დროსაც მათსა და სასაფლაოზე მყოფ შსს-ს სპეცრაზმელებს შორის დაპირისპირება მოხდა.

მურად წურწუმიას 21 წლის ძმამ გაქცევა მოახერხა. ეგონა, რომ მისი ძმაც გაიქცა, თუმცა სახლში მისულმა მურადი ვერ იპოვა და მის საძებნელად დაბრუნდა. ოჯახი მთელი ღამე ეძებდა 24 წლის მამაკაცს, თუმცა ვერ იპოვეს, რადგან მათი თქმით, მურად წურწუმია თავდამსხმელებმა სავარაუდოდ, მანქანით წაიყვანეს და ნაცემი დააგდეს დასახლებულ პუნქტთან.

დილას სასტიკად ნაწამები მამაკაცი გამვლელებმა იპოვეს სასაფლაოს მიმდებარე ტერიტორიაზე. "მთავარი არხის" ინფორმაციით, გარდაცვლილს თვალი ამოთხრილი და თავის ქალა ჩამტვრეული აქვს.

"ინტერპრესნიუსს" შინაგან საქმეთა სამინისტროში განუცხადეს, რომ ახალგაზრდა მამაკაცის გარდაცვალების საქმეზე ერთი პირია დაკავებული. საქმე პროკურატურას გადაეცა და შესაბამისად, მომხდარზე გამოძიებას პროკურატურა აწარმოებს.

გარდაცვლილის ოჯახის მტკიცებით, დანაშაულში რამდენიმე თანამონაწილეა და შსს დანარჩენ ბრალდებუებს ხელს აფარებს.

შსს-ს ინფორმაციით, მომხდარზე გამოძიება სისხლის სამართლის კოდექსის სამი მუხლით არის აღძრული.

"მომხდარ ფაქტთან დაკავშირებით დაკავებულია ერთი პირი. გამოძიება სსკ-ის 126 -ე მუხლის პირველი პრიმა ნაწილია „გ“ ქვ.პუნქტი, 117 მუხლის მე-6 ნაწილით და 143-ე მუხლის პირველი ნაწილით დაიწყო" - აცხადებენ შსს-ში.