ავტორი:

"გამოწვევა იყო, როცა მარინა ბერიძემ მომიწვია" - ვინ არიან ადამიანები, რომლებიც "მხოლოდ ქართულის" მონაწილეებს სცენისთვის ამზადებენ

"გამოწვევა იყო, როცა მარინა ბერიძემ მომიწვია" - ვინ არიან ადამიანები, რომლებიც "მხოლოდ ქართულის" მონაწილეებს სცენისთვის ამზადებენ

"მხოლოდ ქართულის" ბოლო ტური მაცაცო სებისკვერაძის შემოქმედებას მიეძღვნა. კონკურსანტებმა კომპოზიტორის პატრიოტული სიმღერები შეასრულეს. დარბაზში მყოფი ქალბატონი მაცაცო კონკურსანტების ნამღერით კმაყოფილი იყო. კონკურსის წესების თანახმად, ერთმა მონაწილემ დატოვა პროექტი და ეს ლაშა ნანობაშვილი აღმოჩნდა. "მხოლოდ ქართულის" ნახევარფინალში ბრძოლას 5 მონაწილე განაგრძობს.

AMBEBI.GE ამჯერად იმ ადამიანებს გაგაცნობთ, რომლებიც კადრს მიღმა აქტიურად ზრუნავენ იმისთვის, რომ პროექტი წარმატებული იყოს.

თამუნა არჩვაძე, ვოკალის პედაგოგი:

- "მხოლოდ ქართულში" ამ სეზონზე პირველად მიწევს მონაწილეობა, ამიტომ რაღაც ერთგვარი გამოწვევა იყო, როდესაც მარინა ბერიძემ მომიწვია. ძალიან მიყვარს ქართული სიმღერა და მთელი ცხოვრება ქართულ სიმღერას ვემსახურები. არაერთ კომპოზიტორთან, სიმღერის ავტორთან მიმუშავია. ამიტომაც იყო ჩემთვის ეს გამოწვევა საინტერესო. კონკურსანტები კარგად იყვნენ შერჩეულები. ასე რომ, პროექტი ჩემთვის აბსოლუტურად მისაღები და საინტერესოა. მოლოდინი, რომ ამ პროექტში მეტად რეალიზებული ვიქნებოდი, გამართლდა, რადგანაც ძალიან მიყვარს ჩემი საქმე და მზად ვარ, მას ვემსახურო - ეს წინადადება მარინასგან დიდი სიხარულით მივიღე.

ფოტოს ავტორი: ნათათო ასანიძე

- მონაწილეები ადვილად მოდიან სწავლებაზე, ითვალისწინებენ თქვენს რჩევებს?

- ნოემბრიდან ვმუშაობთ მათთან და თითქოს უკვე ერთი ოჯახივით ვართ, ყოველდღე - დილიდან საღამომდე ერთად. დასაწყისში, სანამ ერთმანეთს კარგად გავიცნობდით, პატარა სირთულეები იყო, რადგანაც ჯერ კარგად არ იცოდნენ, სად მოვიდნენ, რა როგორ იქნებოდა, რეპეტიციების ყოველდღიური რეჟიმი, რომ ასე დაიტვირთებოდნენ, დაიღლებოდნენ, ყველას ბოლომდე გაცნობიერებული არ ჰქონდა. რამდენიმე კვირაში ფეხი აგვიწყეს, ტემპს აუჩქარეს, კარგად გამოგვყვნენ...

ახლა ყოველი ორშაბათი ძალიან მიჭირს, რადგანაც პროექტის წესებიდან გამომდინარე, ერთი მონაწილე მიდის, კონკურსს ეთიშება. ეს რთულია, მაგრამ მაინც სულ ვეუბნები, რომ ადრე თუ გვიან პროექტს ყველა დავტოვებთ, მათ შორის, მეც-მეთქი. მოკლედ, ვურჩევ, რომ არ დაითრგუნონ და რა დროც იქნებიან პროექტში, მაქსიმალური სიამოვნება მიიღონ.

- უკვე 5 კონკურსანტი დარჩა...

- თითოეული მათგანი ინდივიდუალურია, ვერავის გამოვყოფ, ვერც რომელიმეს დავასახელებ, სიამოვნებით ვმუშაობ თითოეულთან და ვუსმენ მათ.

ფოტოს ავტორი: ზაქარია ჭელიძე

სოფო ბათილაშვილი, კონსულტანტი პროექტის ვოკალურ ნაწილში:

- "მხოლოდ ქართულის" პირველი სეზონი მესამისგან რადიკალურად განსხვავებულია, ალბათ ამას სივრცის გამოცვლა განაპირობებს, ჩვენ, პირველი სეზონის მონაწილეები "რუსთაველის თეატრში" და "რუსთავი 2"-ის შენობაში ვიყავით. ახლა კი რეპეტიციები და კონცერტები "მთავარი არხის" ოფისში და "კაჭრეთი ამბასადორში" გვაქვს. ენერგეტიკაც სრულიად სხვაა.

ამასთან, მიმდინარე სეზონი მუსიკალურად მარინა ბერიძემ ჩაიბარა, რაც იმას ნიშნავს, რომ ყველაფერი მუსიკალურ ნაწილში ისეა დალაგებული, როგორც მას შეეფერება. მონაწილეები ნიჭიერები, მიზანდასახულები არიან და ერთმანეთისგან არსებითად განსხვავებულები, სერიოზული ტიპაჟები. განსხვავდებიან იუმორით, სურვილებით, აზრებით, გემოვნებით, მუსიკასთან დამოკიდებულებით და კონკურსში მოსვლის მიზანიც სხვადასხვა აქვთ და ამით არის ეს პროექტი საინტერესო. მაგალითად, ანა ქურთუბაძე ლაივიდან ლაივამდე იმდენად დიდ პროგრესს განიცდის, რომ გაოცდებით, საკუთარ თავზე ძალიან შრომობს, ყველაფერს პროფესიონალურად უდგება, თამთა ხუხუნაიშვილი სულ მოწოდების სიმაღლეზეა. მიუხედავად იმისა, რომ სიცხე ჰქონდა, ბოლო ლაივზე კი განსაკუთრებულად ცუდად იყო, ასეთი ხასიათი აქვს, თუ საქმეს ხელი მოჰკიდა, არ არსებობს, თავი დაანებოს, ძალიან მიზანმიმართულია.

გიორგი ძოწენიძე სცენაზე თავისი ხასიათის გამოჩენას არ ერიდება და არის ისეთი, როგორც ცხოვრებაშია. ნინი შონიას ყველამ იცის, რომ კარგი ვოკალი აქვს, ეს არის პირველი გამოცდილება მისი ასეთ მასშტაბურ კონკურსში მონაწილეობის, მას ბევრ ჟანრში აქვს ძალები მოსინჯული, მაგრამ თუ უფრო გახსნის საზღვრებს იმისთვის, რომ ყველა ჟანრი მიიღოს, მოირგოს, მსმენელს მიაწოდოს, შეიძლება, ისეთი თვისებებიც გამოავლინოს, რომელიც არც იცის, რომ აქვს. რასაც ვაკვირდები, სხვა მონაწილეებისგან განსხვავებით, მას ზოგჯერ განმარტოებით ჯდომაც უყვარს...

ლუკა ჭოხონელიძე რეპეტიციაზე ყველას სიმღერას მღერის. სულ უნდა, რომ ნებისმიერს მეორე ხმა მისცეს, უნდა რომ ყველაფერში ჩართული იყოს. ხუმრობს ბავშვებთან... ვისაც ჩემი გამოცდილების გაზიარება სჭირდება, უკან არ ვიხევ და ჩემს აზრს მოკრძალებულად გამოვთქვამ.

ფოტოს ავტორი: ნათათო ასანიძე

კოტე ფურცელაძე, ქორეოგრაფი, რეჟისორი:

- წელს ამ კონკურსში პირველად ჩავერთე, შემოთავაზებას იმის გამო დავთანხმდი, რომ პროექტზე პროფესიონალი გუნდი მუშაობს. თან, წელს მგონი, რაღაც განსხვავებული სეზონია. საინტერესო კონკურსანტები არიან და ამიტომ მინდოდა, ისინი სცენაზე თავისი სხვადასხვა, პატარა ისტორიით წარმდგარიყვნენ. მნიშვნელობა არ აქვს, კონკურსანტი გაიმარჯვებს თუ არა. მთავარია, თავისი ნომრებით მაყურებელს თავი დაამახსოვროს. თუ რაღაცით შევძელი, ეს ბავშვები აუდიტორიას დავამახსოვრე, დიდი ბედნიერება იქნება. ქორეოგრაფი კი ვარ, მაგრამ ვინაიდან ქართულ სიმღერასთან გვაქვს საქმე, ქორეოგრაფიას ვერ გამოვიყენებთ. თან, ეს სეზონი იმითაა გამორჩეული, რომ ახალბედა ბავშვები იყვნენ, ზოგი აქამდე საერთოდ სცენაზეც არ მდგარა. ამიტომ, ქორეოგრაფიასთან ერთად, რაღაც ფუნქციებიც შევითავსე უკანა ფონებით თუ განათებით, დრამატურგიით. ეს ყველაფერი ყველა მონაწილესთან ერთად შესაბამისად გამოვიდა.

- ეს გია ყანჩელის ტურზე მეტად შეიგრძნობოდა...

- კი, ნინი შონიას ორმეტრიან კვარცხლბეკზე შემოსკუპება, თამთა ხუხუნაიშვილის ორმაგი სახე - ქალისა და მამაკაცის სამოსი ერთდროულად რომ ეცვა, ეს ჩემი იდეა იყო. რაც მთავარია, ყოველ ტურზე ყოველ ჩემს გადაწყვეტილებას პროდიუსერებს ვუთანხმებ და ისინიც ერთხმად იწონებენ, მის განხორციელებაში მეხმარებიან.

საერთოდ, საოცარ პროფესიონალებთან მიწევს მუშაობა. რომელიმეს გამოყოფა მიჭირს, მიუხედავად იმისა, რომ უდიდესი გამოცდილება მაქვს, მათთან ერთად, ამ მასშტაბური ტელეპროექტის კეთებისას ბევრ რამეს კიდევ ვსწავლობ. "მხოლოდ ქართული" ყველასთვის სასარგებლო პროექტია.

მთავარი ფოტოკოლაჟი: ზაქარია ჭელიძე

ძლიერი თოვა, ნისლი და ქარბუქი - უახლოესი დღეების ამინდის პროგნოზი საქართველოში

ილია მეორეს ბათუმში, ერთ-ერთ კლინიკაში გამოკვლევა უტარდება - პატრიარქის ექიმის კომენტარი

კორონავირუსის გამო, ჩინეთში საზოგადოებრივი ტრანსპორტი მუშაობას წყვეტს - როგორია საქართველოს ჯანდაცვის სამინისტროს  სამოქმედო გეგმა