"ბავშვს ხელებს სპირტიანი ხსნარით ნუ დაუმუშავებთ, გაიყვანეთ ისინი ღია ცის ქვეშ" - ინგა მამუჩიშვილის რჩევები მშობლებს კორონავირუსთან საბრძოლველად

"ბავშვს ხელებს სპირტიანი ხსნარით ნუ დაუმუშავებთ, გაიყვანეთ ისინი ღია ცის ქვეშ" - ამის შესახებ ცნობილმა პედიატმა ინგა მამუჩიშვილმა "პალიტრანიუსის" გადაცემაში "დღის თემა განაცხადა.

მისი თქმით, პირველ რიგში აუცილებელია, სახლში მისვლის შემდეგ მშობლებმა ბავშვებთან მიახლოვებამდე ყველა ჰიგიენური წესი დაიცვან.

როგორც მამუჩიშვილი ამბობს, მნიშვნელოვანია პატარები ხშირად გაიყვანონ სუფთა ჰაერზე, თუმცა აქვე დასძენს, რომ ასეთ შემთხვევაში აუცილებელია დაცული იყოს გარკვეული დისტანცია.

• VIDEO: ერთი რამ, რასაც კორონავირუსისგან თავის დასაცავად ყველა ვაკეთებთ, მაგრამ არასწორია - რჩევები მშობლებს

"ზოგადად, რეკომენდაციები ამ ვირუსთან დაკავშირებით არის საერთო. მე მინდა მოვუწოდო მშობლებს, რომ ქუჩიდან შემოსულები ნუ აკოცებთ ბავშვებს, ნუ მიხვალთ მათთან იმ ტანსაცმლით, რომლითაც ქუჩაში იყავით, ნუ შეეხებით ბავშვებს დაუბანელი ხელებით, ნუ გადაკოცნით.

გამოიცვალეთ, დაიბანეთ ხელი, იხმარეთ სადეზინფექციო ხსნარი და ასე მიუახლოვდით პატარებს, თუმცა აქაც გადაკოცნისგან და ჩაკოცვნისგან თავი უნდა შევიკავოთ. ქუჩაშიც უცხო ადამიანებმა იციან, ლოყაზე ბავშვს მოუთათუნებენ ხოლმე, ეს დაუშვებელია.

არ ვარ წინააღმდეგი იმისა, რომ პატარები ღია ცის ქვეშ ატარონ, ასეირნონ, თუმცა უნდა დაიცვან სოციალური დისტანცირება. დაახლოებით მეტრნახევარი-ორი მეტრით ნუ მიუახლოვდება ნურავინ ბავშვს" - აღნიშნა მამუჩიშვილმა.

პედიატრის განმარტებითვე, არ არის რეკომენდირებული, რომ ბავშვებს ხელები სპირტის შემცველი ხსნარებით დაუმუშაონ. როგორც მამუჩიშვილი ამბობს, უმჯობესია ამ შემთხვევაში ჩვეულებრივი საპონი ან ბავშვის ჰიგიენური საშუალებები იქნას გამოყენებული.

"ბავშვებს სპირტის ხსნარებით ნუ დაუმუშავებთ ხელებს, არსებობს ანტიბაქტერიული ხელსახოცები, რომლითაც შეგვიძლია მათ ხელი გავუწმინდოთ. სპირტიანი ხსნარით დამუშავებაზე თავი შევიკავოთ, რადგან ბავშვის კანი ხსნარს სწრაფად იწოვს და შეიძლება ალერგია გამოიწვიოს

რაც შეეხება კვების რეჟიმს, მინდა მშობლებს მოვუწოდო, რომ შვილებს დიდი რაოდენობით სითხეები მისცენ. როდესაც ვირუსი ეკრობა ლორწოვან გარსს, ამ დროს ლორწოვანი გარსი არ უნდა იყოს მშრალი და ის მუდმივად უნდა ტენიანდებოდეს.

მიეცით პატარებს მეტი რაოდენობით ჯანსაღი საკვები - ხილი, ბოსტნეული, ბუნებრივად მდიდარი ვიტამინებით გაჯერებული საკვები, ასევე კარგია ცილოვანი დატვირთვა, რძის პროდუქტები. შევეცადოთ ჯანსაღად ვკვებოთ ისინი. არ წავიყვანოთ ბავშვები თავშეყრის ადგილზე, როგორებიც არის "ფასტ ფუდები"... ასეთი საკვები მათთვის კარგს არ მოიტანს" - განაცხადა პედიატრმა.