"ორის მდგომარეობა მძიმეა, რამდენიმე პაციენტის კი პრობლემური, რადგან აქვთ ასაკი და თანმხლები დაავადებები" - თენგიზ ცერცვაძე ინფიცირებულებზე

ინფექციური საავადმყოფოს დირექტორის თენგიზ ცერცვაძის ინფორმაციით, კორონავირუსით დაინფიცირებული 37 პაციენტიდან ორის მდგომარეობა არის მძიმე. ამის შესახებ მან ჟურნალისტებთან საუბრისას განაცხადა.

"ამ დროისთვის ქვფეყანაში 38 დადასტურებული შემთხვევაა. იცით, რომ ერთი გაწერილია უკვე. რაც შეეხება დარჩენილ 37 პაციენტს, მათგან ორი პაციენტის მდგომარეობა არის მძიმე, რამდენიმე პაციენტის კი პრობლემური, რადგან აქვთ ასაკი და თანმხლები დაავადებები - მაგალითად, მაღალი არტერიული წნევა ან გულის უკმარისობა. პნევმონია აქვს სულ 11 ავადმყოფს. მათი მდგომარეობა საშუალო სიმძიმისაა, ხოლო დანარჩენი პაციენტების მდგომარეობა არის მსუბუქი" - აღნიშნა ცერცვაძემ.

მისი ინფორმაციით, გამოჯანმრთელების კანდიდატი მეორე პაციენტის გამოკვლევის მასალა აღებულია და გაგზავნილია ლუგარში. როგორც ცერცვაძემ განაცხადა, პასუხები გვიან ღამით იქნება ცნობილი.

არსებული ინფორმაციით, ამჟამად, კარანტინის რეჟიმშია 1344 ადამიანი, ხოლო სტაციონარში მეთვალყურეობის ქვეშ - 216 პირი. 38 ადამიანიდან 1 გამოჯანმრთელებულია.