ეზუგბაია: "ყველაზე მძიმედაა ასაკოვანი ქალბატონი - ორმხრივ პნევმონიასთან ერთად, სეფსისის დიაგნოზიც დასტურდება"

თბილისის ცენტრალური ინფექციური საავადმყოფოს სამედიცინო დირექტორის მარინა ეზუგბაიას განმარტებით, მათთან მყოფი ერთ-ერთი ინფიცირებულის მდგომარეობა მძიმეა:

"ყველაზე მძიმეა ასაკოვანი ქალბატონი, რომელზეც მუდმივად ვლაპარაკობთ, რომ რისკის შემცველია თავისი ასაკის გამო, თან ამას ემატება თანარსებული მძიმე ნევროლოგიური და გულ-სისხლძარღვთა დაავადება. დღეისათვის, დაავადება პროგრესირებს ორმხრივ პნევმონიასთან ერთად, ამ პაციენტთან სეფსისის დიაგნოზიც დასტურდება და მიმდინარეობს შესაბამისი მკურნალობა. პროგნოზების გაკეთება შეუძლებელია, ვნახოთ, დინამიკაში როგორი სიტუაცია იქნება" - აღნიშნა ეზუგბაიამ.

მისივე თქმით, ქვეყანაში ამჟამად დაფიქსირებული 73 შემთხვევიდან, ინფექციურ საავადმყოფოში 42 პაციენტი მკურნალობს. მათ შორისაა, კორონავირუსით ინფიცირებული 3 ახალი პაციენტიდან 2 პაციენტი.