ხვალიდან საქართველოში სრულიად იკრძალება მსუბუქი ავტომობილების მოძრაობა

ხვალიდან საქართველოში სრულად იკრძალება მსუბუქი ავტომობილების მოძრაობა. ამის შესახებ პრემიერ-მინისტრის პრესსპიკერმა ირაკლი ჩიქოვანმა განაცხადა, რომელიც საგანგებო ბრიფინგზე ამირან გამყრელიძესა და პაატა იმნაძესთან ერთად გამოვიდა.

ჩიქოვანის თქმით, მიუხედავად იმ შეზღუდვებისა, რაც მთავრობამ ბოლო პერიოდში მიიღო, ქვეყანაში მაინც შეინიშნება მოქალაქეების ხშირი გადაადგილება და შეკრებები სხვადასხვა ადგილას. ამიტომ მიღებული იქნა გადაწყვეტილება, რომ ხვალიდან, 17 აპრილის 12:00 საათიდან, ქვეყნის მთელს ტერიტორიაზე აიკრძალოს მსუბუქი ავტომობილების გადაადგილება. შეზღუდვა იმოქმედებს 21 აპრილის ჩათვლით.

"დაწესებული ზომების დამატებით გამკაცრების შესახებ ვიღებთ გადაწყვეტილებას - ხვალ, 17 აპრილს, დღის 12:00 საათიდან საგანგებო მდგომარეობის მოქმედების ვადით, ანუ 21 აპრილის ჩათვლით, ქვეყანაში სრულად იკრძალება მსუბუქი ავტომობილებით გადაადგილება. შეზღუდვა არ ვრცელდება ტვირთების გადაზიდვაზე და დისტრიბუციის მანქანებზე.

ხაზგასმით აღვნიშნავ, რომ სასურსათო მაღაზიები, აფთიაქები და ყველა სხვა ობიექტი, რომელიც აქამდე მუშაობდა, ჩვეულებრივ რეჟიმში აგრძელებს მუშაობას და ასევე, მუშაობას აგრძელებს მიტანის სერვისები" - განაცხადა პრემიერ-მინისტრის პრესსპიკერმა ირაკლი ჩიქოვანმა.

ზომების გამკაცრების გადაწყვეტილება მთავრობამ კორონავირუსის გავრცელების პრევენციის მიზნით მიიღო.