მსუბუქი ავტომანქანებით მოძრაობა აკრძალულია 27 აპრილის დღის ბოლომდე

პრემიერ-მინისტრის პრესსპიკერმა ირაკლი ჩიქოვანმა მთავრობის ადმინისტრაციაში გამართულ ბრიფინგზე განაცხადა, რომ მსუბუქ ავტომანქანებზე დაწესებული შეზღუდვა 27 აპრილსაც იმოქმედებს.

მისივე თქმით, მიუხედავად იმისა, რომ საგანგებო მდგომარეობა გრძელდება 22 მაისის ჩათვლით, მთავრობა ეცდება თანდათან მოხსნას შეზღუდვები.

"კორონავირუსის გავრცელების პრევენციის მიზნით საკოორდინაციო საბჭოს მიერ იქნა მიღებული გადაწყვეტილება და საგანგებო მდგომარეობის ფარგლებში, 17 აპრილის 12:00 საათიდან 27 აპრილის დღის ბოლომდე გაგრძელდა შეზღუდვა, რომელიც შეეხებოდა მსუბუქი ავტომობილებით გადაადგილებას.

ჩვენს მოქალაქეებს კიდევ ერთხელ მინდა ავუხსნა, რომ ხელისუფლების მიერ გატარებული ყველა ღონისძიება, ყველა შეზღუდვა და ყველა რეკომენდაცია, რომელიც არსებობს, ემსახურება მხოლოდ და მხოლოდ ერთს, რომ ჩვენ მაქსიმალურად შევამციროთ ის ზიანი, რაც შეიძლება კოვიდ 19-მა მიაყენოს ჩვენს საზოგადოებას და ჩვენს მოქალაქეებს.

ყველა რეგულაციის, ყველა შეზღუდვის მიზანია, რომ დავიცვათ ჩვენი თითოეული მოქალაქის სიცოცხლე, მაქსიმალურად შევაფერხოთ კოვიდ 19-ის გავრცელება და მივცეთ ჩვენს მართლაც რომ გმირ ექიმებს იმის საშუალება, რომ ყველა ჩვენი თანამოქალაქე მაღალი ხარისხის მომსახურებით უზრუნველყონ და შეძლონ მათი სიცოცხლისთვის ბრძოლა" - განაცხადა ჩიქოვანმა.

ამასთან, იმისთვის, რომ სასოფლო-სამეურნეო სამუშაოებს ხელი არ შეეშალოს, რეგიონებში დაიშვა გამონაკლისი და ადგილობრივები შეძლებენ დილის 6-დან რვა საათამდე რეგიონებში გადაადგილებას, საღამოს 6 საათიდან 7 საათამდე კი შეძლებენ სახლებში ავტომანქანით დაბრუნებას.