"ჩვენ, ექიმებმა რაც დავინახეთ, ნეტა არ გვენახა!" - ლევან რატიანი

თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორმა ლევან რატიანმა "პალიტრანიუსის" გადაცემა "სპეცპროექტი COVID-19"-თან ინტერვიუში კიდევ ერთხელ გაამახვილა ყურადღება სოციალურ დისტანცირებასა და სახლში დარჩენის აუცილებლობაზე.

"ექიმების მთავარი მოთხოვნაა - უნდა დავცილდეთ ფიზიკურად ერთმანეთს, რომ მომავალ წელს გაზაფხული ვნახოთ, მხოლოდ ეს გადაგვარჩენს. რატომ გავბრაზდით? როცა თქვენთვის ვმუშაობთ, თქვენც უნდა მიიღოთ საზოგადოებამ, რომ დარჩეთ სახლში.

ჩემი როგორც ექიმის პრეროგატივაა ყველას ვუთხრა: ღმერთმა საავადმყოფოში ამ დაავადების გართულებით ნუ მოგახვედროთ. ძალიან ცუდი წარმოსადგენია რაც აქ ხდება... ჩვენ ექიმებმა რაც დავინახეთ, ნეტა არ გვენახა! ესაა მომენტი, როცა ადამიანი იხრჩობა და შველას გთხოვს. ეს არ ხდება ეტაპურად, ეს ხდება წამებში და წუთებში...

წაიკითხეთ: "ოჯახის წევრს, იმიტომ რომ თვითონ ესიამოვნა და იყო სადღაც, ახლა დედა უკვდება რეანიმაციაში" - ლევან რატიანი

ყველაზე დიდი წყევლაა "უნდინას წყევლა", რაც ნიშნავს რომ თავის ტვინი ითიშება და სუნთქვის უკმარისობით კვდებიან ადამიანები. ზუსტად "უნდინას წყევლის" სუნთქვის უკმარისობით მიმდინარეობს ეს დაავადება და ნუ გამოიწვევს ჩვენი მოსახლეობა მას, დავრჩეთ სახლში და არ გადავდოთ ერთმანეთს, რომ არ მოვკვდეთ" - აღნიშნა ლევან რატიანმა "სპეცპროექტი COVID-19"-თან საუბარში.