"ჩემი ხელფასი თვეში 10 ათასი დოლარია, ეს სახლი კი სულ 100 კვ.მ-ია" - მიხეილ სააკაშვილი დედის მიმართვას ავრცელებს

"სალამი პოროშენკოს ნაბიჭვარს პირდაპირ დედაჩემისგან", - ამ სათაურით აქვეყნებს "ფეისბუქის" პირად გვერდზე საქართველოს ყოფილი პრეზიდენტი მიხეილ სააკაშვილი, დედის, გიული ალასანიას ვიდეომიმართვას.

ვიდეოში გიული ალასანია უკრაინელ ჟურნალისტს სერგეი პოიარკოვს პასუხობს, რომელმაც ტელეკომპანია Zik-ის ეთერში, კიევთან ახლოს მდებარე სააკაშვილის სახლის ფინანსებთან დაკავშირებით ისაუბრა. მისი თქმით, სააკაშვილის დედას "რომ არ ეჭამა, ესვა და საპირფარეშოში არ შესულიყო, ასეთი მდიდრული სახლის აშენების უფლებას თავს მაინც ვერ მისცემდა".

საპასუხოდ გიული ალასანიამ საკუთარი ანაზღაურების ოდენობა დაასახელა და აღნიშნა, რომ სახლი არც ისე ძვირადღირებული და დიდია.

"ახლახანს გავიგე, რომ ვინმე პოიარკოვს ეჭვი გამოუთქვამს, რომ ნაკვეთი, რომელზეც ეს სახლი დგას, ჩემი ნაყიდია. საქმე ისაა, რომ მე პროფესორი და საქართველოში ერთ-ერთი უმხვილესი კერძო სასწავლებლის - საქართველოს უნივერსიტეტის დამფუძნებელი და პრეზიდენტი ვარ. უკვე დიდი ხანია ჩემი ხელფასი, ყოველთვიურად საშუალოდ, 10 ათასი დოლარია.

ეს ნაკვეთი დიდი არ არის, დაახლოებით, ათასი კვადრატული მეტრია, სახლი სამი წელია შენდება, მისი ფართობიც სულ 100 კვადრატული მეტრია, ეს მომცრო სახლია, და ვფიქრობ, შემეძლო ასეთი სახლის აშენების უფლება მიმეცა ჩემი თავისთვის. მთელი ცხოვრება პატიოსანი შრომით ვცხოვრობ, ამასვე აკეთებდა ჩემი ვაჟიც. ასე რომ, არავითარ შემთხვევაში არავის მივცემ უფლებას მისი და ჩემი სახელი შეურაცხყოს", - აცხადებს გიული ალასანია.

შეგახენებთ, რამდენიმე დღის წინ მიხეილ სააკაშვილმა თათია შარანგიასთან "ინსტაგრამის" ლაივში ჩართვის დროს ისაუბრა, როგორ ცხოვრობს კიევის გარეუბანში მდებარე სახლში.

გასულ წელს სააკაშვილმა უკრაინულ ტელეკომპანია "24 Канал"-ის გადამღებ ჯგუფს კიევის გარეუბანში მდებარე ელიტური სახლი დაათვალიერებინა. მაშინ ინტერვიუში აღნიშნა, რომ სახლს თითქმის სამი წლის განმავლობაში აშენებდნენ. მიწის ნაკვეთი 550 კვ.მეტრი ფართობისაა და მისი ღირებულება 30 ათასი დოლარია.