ყინწვისის მამათა მონასტრის წინამძღვარს პატიმრობა შეეფარდა

გორის რაიონული სასამართლო ყინწვისის მამათა მონასტრის წინამძღვარის აღკვეთის ღონისძიების სახით პატიმრობა შეუფარდა. გადაწყვეტილემა რამდენიმე წუთის წინ გამოცხადდა.

მოსამართლე გოგა კუპრეიშვილმა დააკმაყოფილა ბრალდების მხარის მოთხოვდა. წინასასამართლო სხდომა გორის რაიონულ სასამართლოში 22 ივნისს გაიმართება.

სასამართლო სხდომა დისტანციურ რეჟიმში მიმდინარეობდა.

ცნობისთვის, დავით (კობა) კობაიძეს ბრალი ოფიციალურად გუშინ წაუყენეს.

გამოძიების ინფორმაციით, რამდენიმე დღის წინ, დაკავებულმა დავით (კობა) კობაიძემ გორის რაიონის სოფელ რიეთის საავტომობილო გზაზე გადაადგილებისას, სავარაუდოდ, ავტომატური ცეცხლსასროლი იარაღიდან ცეცხლი გაუხსნა დაზარალებულის მართვის ქვეშ მყოფ ავტომანქანას, რის შემდგომაც შემთხვევის ადგილიდან მიიმალა.

სასულიერო პირი განზრახ მკვლელობის მცდელობისა და ცეცხლსასროლი იარაღის უკანონო შეძენა-შენახვა-ტარების ბრალდებით დააკავეს.

დანაშაული 7-დან 15 წლამდე ვადით თავისუფლების აღკვეთას ითვალისწინებს. მომხდართან დაკავშირებით გამოძიება სისხლის სამართლის კოდექსის 19-108-ე მუხლით და 236-ე მუხლის მე-3 და მე-4 ნაწილებით გრძელდება, რაც განზრახ მკვლელობის მცდელობასა და ცეცხლსასროლი იარაღის უკანონო შეძენა-შენახვას გულისხმობს.