2-თვიანი კარანტინის შემდეგ, იტალიელები სახლებიდან გამოვიდნენ - Reuters-ის ფოტოებს ემოციების გარეშე ვერ ნახავთ

იტალია თანდათან ჩვეულ ცხოვრებას უბრუნდება. დღეს ქვეყანაში კორონავირუსის გამო დაწესებული ზოგიერთი შეზღუდვა მოიხსნა.

10 მარტიდან, რაც იტალიის მთელს ტერიტორიაზე კარანტინი გამოცხადდა, იტალიელები COVID-19-ის აფეთქების გამო სახლებში დარჩნენ. მსოფლიომ ნახა, როგორ ცდილობდნენ ისინი ერთმანეთის აივნებიდან გამხნევებას. დღეს კი საშუალება მიეცათ ერთმანეთი უშუალოდ მოენახულებინათ და სკვერებში ესეირნათ.

განაახლეს მუშაობა საწარმოებმა, სამშენებლო კომპანიებმა და საბოლოო ჯამში სამუშაო ადგილს 4,5 მილიონი ადამიანი დაუბრუნდა. მოქალაქეებს საცხოვრებელთან ახლოს მდებარე პარკებსა და სკვერებში სეირნობის უფლება მიეცათ. იმაზე, თუ რა ხდება იტალიაში კარანტინის წესების შემსუბუქების შემდეგ, სააგენტო Reuters-ის ფოტორეპორტაჟი გვიყვება.

დღეს რომში ბევრ ჩახუტებულ ბებიას და შვილიშვილს ნახავდით, რომლებსაც ერთმანეთი დიდი ხანი არ ენახათ.

"დილის 5:30 საათზე ავდექი და ძალიან აღტაცებული ვიყავი“, - ამბობს "როიტერსთან" მარია ანტონეტა გალუზო, რომელიც 3 წლის ბიჭუნას ბებიაა. მისი აღტაცების მიზეზი კი ის იყო, რომ 8 კვირის შემდეგ შვილიშვილს ნახავდა და მასთან ერთად ისეირნებდა.

"რამხელა გაზრდილა, ეს შესანიშნავია“, - ამბობს იტალიელი ბებო.

როგორც "როიტერსი“ წერს, იტალიაში ზოგიერთი გარე კაფეც გაიხსნა.

"ეს ყველაზე გემრიელი ყავაა, რაც კი ბოლო რვა კვირაში დამილევია, ალბათ, ეს ის არის, რაც ყველაზე მეტად მომენატრა, ბარები, კაფეები, ჩვენი სოციალური ცხოვრების განუყოფელი ნაწილია და როცა მათ დაკეტილს ვხედავდი, ეს დიდი ტრავმა იყო“, - ამბობს იტალიელი რიკარდო მონტი.

იტალია კორონავირუსით ინფიცირებულთა რაოდენობის თვალსაზრისით მსოფლიოს მესამე ქვეყანაა. საბოლოო ჯამში, COVID-19-ით 210 717 ადამიანი დაინფიცირდა, ხოლო 28 884 გარდაიცვალა, გამოჯანმრთელებულთა რაოდენობა ამ დროისთვის 81 654-ს შეადგენს.