"სწრაფი ტესტი, რომელიც მას გაუკეთდა, ხარვეზიანი იყო" - კახეთში სასწრაფოს ექიმს PCR ტესტით ვირუსი არ აღმოაჩნდა

ჯანდაცვის მინისტრის პირველი მოადგილის, თამარ გაბუნიას განცხადებით, კახეთში სასწრაფო-სამედიცინო დახმარების ექიმს, რომელიც სწრაფი ტესტით კოვიდინფიცირებულად ითვლებოდა, PCR ტექნოლოგიით ჩატარებული ტესტის შედეგად ვირუსი არ აღმოაჩნდა.

გაბუნიამ ჟურნალისტებთან საუბარში არ გამორიცხა, რომ სწრაფი ტესტი, რომელიც ექიმს გაუკეთდა, ხარვეზიანი იყო.

"არ დადასტურდა ამ შემთხვევაში კორონავირუსი. ველოდებოდით დამატებით კვლევას. ბოლო კვლევის პასუხი ჩემთვის ჯერჯერობით ცნობილი არ არის, მაგრამ რასაც განაცხადებს დაავადებათა კონტროლის ცენტრი, უნდა ენდოთ მათ განცხადებას.

შესაძლოა, ეს იყოს ტესტის ხარვეზი, ტესტის ხარვეზები ხდება. არ არის გამორიცხული, რომ იყოს PCR ტექნოლოგიების გამოყენების დროსაც იყოს ცრუ დადებითი, რომელიც ასვეე ექვემდებარება გადამოწმებას და სწორედ ამიტომ ხდება ამ შედეგების გადამოწმება რამდენჯერმე", - განაცხადა გაბუნიამ "ტვ პირველის" ეთერში.

შეგახსენებთ, რომ კახეთში სასწრაფო დახმარების ექიმს სწრაფი ტესტის მიხედით კორონავირუსი რამდენიმე დღის წინ გამოუვლინდა. აღნიშნულის გამო შემოწმდა მასთან კონტაქტში მყოფი ათეულობით პირი, მათ შორის მისი ოჯახის წევრები, პაციენტები და კოლეგა ექიმები.