ავტორი:

როგორ შეიცვალა თბილისის სამ გამზირზე ჰაერის დაბინძურების მაჩვენებლები 2019 წელთან შედარებით

როგორ შეიცვალა თბილისის სამ გამზირზე ჰაერის დაბინძურების მაჩვენებლები 2019 წელთან შედარებით

გარემოს ეროვნული სააგენტოს ინფორმაციით, სატრანსპორტო მოძრაობის მკვეთრად შემცირების შედეგად, საქართველოს მთელ ტერიტორიაზე ჰაერის დაბინძურების მაჩვენებელი მნიშვნელოვნად შემცირებულია. სააგენტოს ცნობით, განსაკუთრებით შემცირებულია ჰაერში აზოტის დიოქსიდის შემცველობა.

"ბოლო პერიოდის განმავლობაში დედაქალაქში, ისევე როგორც საქართველოს მთელ ტერიტორიაზე, ატმოსფერული ჰაერის დაბინძურების მაჩვენებლები მნიშვნელოვნად შემცირებულია.

აღნიშნული ძირითადად სატრანსპორტო საშუალებების მოძრაობის მკვეთრმა შემცირებამ გამოიწვია. განსაკუთრებით შემცირებულია ჰაერში აზოტის დიოქსიდის შემცველობა, რაც სავარაუდოდ დაკავშირებულია ავტოტრანსპორტიდან გამონაბოლქვის შემცირებასთან.

აღსანიშნავია, რომ სადგურებზე, რომლებიც განთავსებულია გზის პირას, ავტოტრანსპორტით დატვირთული ქუჩების გასწვრივ, მათ შორის წერეთლისა და ყაზბეგის გამზირებზე, უფრო მეტად ფიქსირდება აზოტის დიოქსიდის კონცენტრაციების კლების ტენდენცია, ვიდრე ფონურ სადგურებზე", - აღნიშნულია გარემოს ეროვნული სააგენტოს მიერ გავრცელებულ ინფორმაციაში.

სააგენტო ასევე ავრცელებს მონაცემებს, სადაც გრაფიკულად აღწერილია, თუ როგორ შემცირდა ჰაერის დაბინძურების მაჩვენებელი თბილისის სამ გამზირზე 2020 წელს 2019 წელთან შედარებით.

კორონავირუსის გავრცელების პრევენციის მიზნით მსოფლიოს უმეტეს ქვეყანაში საგანგებო მდგომარეობა გამოცხადდა, შემცირდა ავტოტრანსპორტით გადაადგილება, შეჩერდა ქარხნების მუშაობა, რის შედეგადაც, მთელ მსოფლიოში მნიშვნელოვნად გასუფთავდა ჰაერი. NASA-მ თანამგზავრიდან გადაღებული ფოტოებიც გამოაქვეყნა, რომელზეც ჩანს, თუ როგორ გასუფთავდა ჰაერი ჩინეთის ქალაქ უხანის თავზე და როგორ გაიწმინდა გამონაბოლქვისგან (ნახეთ ფოტოები).