აჭარა "მწვანე ზონაა" - რეგიონში ყველა კოვიდინფიცირებული პაციენტი განიკურნა

აჭარის მთავრობის თავმჯდომარის, თორნიკე რიჟვაძის განცხადებით, რეგიონში კორონავირუსით ინფიცირებული ბოლო ორი პაციენტიც განიკურნა და აჭარამ "მწვანე ზონის" სტატუსი დაიბრუნა.

როგორც მან აღნიშნა, 30 აპრილის შემდეგ რეგიონში ინფიცირების ახალი შემთხვევა არ გამოვლენილა.

"რეგიონში ბოლო ორი კოვიდინფიცირებული განიკურნა, შესაბამისად, აჭარამ დაიბრუნა „მწვანე ზონის" სტატუსი.

ჩვენ 30 აპრილის შემდეგ რეგიონში აღარ გვყავს ახალი დაინფიცირებული და ბუნებრივია, ეს არის საკმაოდ დადებითი, პოზიტიური შედეგი, მაგრამ ეს კიდევ ერთხელ ხაზგასმით გვინდა აღვნიშნოთ, რომ არ არის მოდუნების, თვითკმაყოფილების საფუძველი. ჩვენ გვმართებს, რომ მოსახლეობასთან ერთად გავაგრძელოთ იმ რეკომენდაცების შესრულება, რომელიც შემუშავებულია ჯანდაცვის უწყებების მხრიდან”, - განაცხადა რიჟვაძემ.

რეგიონში კორონავირუსის პირველი შემთხვევა 14 მარტს დადასტურდა. აჭარაში კორონავირუსი სულ 70-მა პირმა დაამარცხა, ვირუსის შედეგად გარდაიცვალა 2 პაციენტი.