რესტორნები და სასტუმროები სტუმრებისთვის სრული მომსახურების გაწევას 8 ივნისიდან შეძლებენ

"ვირუსის გავრცელება ქვეყანაში ექვემდებარება კონტროლს" - ამის შესახებ პრემიერმა გიორგი გახარიამ უწყებათაშორისი საკოორდინაციო საბჭოს მორიგი სხდომის დაწყებამდე განაცხადა.

მისი თქმით, არსებული სიტუაცია იძლევა საშუალებას, კიდევ უფრო შემსუბუქდეს არსებული შეზღუდვები. შესაბამისად, მიუხედავად იმისა რომ ვირუსი ჯერ არ დაგვიმარცხებია, მიღებულია შემდგომი შემსუბუქებების გადაწყვეტილება.

მთავრობის მეთაურმა აღნიშნა, რომ 8 ივნისიდან, აღდგება ყველა სახის მომსახურება რესტორნებში, ასევე გაიხსნებს სასტუმროები და საქალაქთაშორისო ტრანსპორტიც.

"ეს ნიშნავს იმას, რომ რესტორნებს სრულად შეეძლებათ მუშაობა. 8 ივნისიდან ასევე გაიხსნება სასტუმროები, მხოლოდ ის სასტუმროები, რომლებსაც გავლილი ექნებათ ჯანდაცვის სამინისტროს შესაბამისი უწყებების შემოწმება და ექნებათ ამაზე კონკრეტული სახის ნებართვა. გაიხსნება საქალაქთაშორისო ტრანსპორტიც. ეს ნაბიჯები მიღებულია, პირველ რიგში, ჩვენი მოქალაქეების ინტერესებიდან გამომდინარე, მათი სოციალური და ეკონომიკური ინტერესების გათვალისწინებით,“- განაცხადა გიორგი გახარიამ.

• 29 მაისიდან აღდგება ყველა სახის მუნიციპალური ტრანსპორტის მოძრაობა, აუცილებელი იქნება პირბადის ტარება
• პირველი ივნისიდან გაიხსნება ყველა სახის ღია მაღაზია, მათ შორის მოლები, ღია და დახურული ბაზრობები და ღია სივრცის მქონე რესტორნები
• 8 ივნისიდან რესტორნებში ყველა სახის მომსახურება გაიხსნება, შესაბამისად, რესტორნები სრულად შეძლებენ მუშაობას
• 8 ივნისიდან გაიხსნება სასტუმროები, რომელთაც ექნებათ გავლილი შემოწმება და ექნებათ ნებართვა
• 8 ივნისიდან აღდგება საქალაქთაშორისო ტრანსპორტით გადაადგილება