"კონკრეტული ნომრით ურეკავენ ხალხს... აძლევენ ჩემს ნომერს და ეუბნებიან, მიმართეთ მას, თქვენ გეკუთვნით 400-ლარიანი დახმარებაო" - ხუნდაძე

ჯანდაცვის კომიტეტის თავმჯდომარე დიმიტრი ხუნდაძე აცხადებს, რომ ბოლო კვირაა მასთან არაერთი ზარი შედის.

როგორც ხუნდაძემ პარლამენტში განაცხადა, ადამიანები ურეკავენ და ეუბნებიან, რომ მისი ნომერი მისცეს, უთხრეს, დაერეკათ და 400-ლარიან დახმარებას და 150 ლარიან ვაუჩერს მიიღებენ.

დიმიტრი ხუნდაძის თქმით, ეს ქმედება საზოგადოების გაღიზიანებას და პოლიტიკური სარგებლის მიღებას უკავშირდება.

"ბოლო კვირაა ჩემთან შემოდის არაერთი ზარი. ხულოდან იყო 40 წუთის წინ ზარი, შემდეგ შემიძლია კონკრეტულ უწყებებს გადავცე ნომერი, რომელიც გაარკვევს. ეს არ იყო პირველი შემთხვევა. კონკრეტული ნომრით უკავშირდებიან და მოსახლეობას აძლევენ ჩემი და კიდევ ერთი კომიტეტის თავმჯდომარის ნომერს და ეუბნებიან, რომ მიმართეთ მათ, თქვენ გეკუთვნით 400-ლარიანი დახმარება და 150 ლარიანი ვაუჩერი.

ესეც, რა თქმა უნდა, ემსახურება საზოგადოების გაღიზიანებას და შემდეგ ამაში პოლიტიკური სარგებლის ძიებას. ალბათ კარგად მიხვდებით სად შეიძლება იყოს მისამართი ასეთი დაგეგმარების“, -აღნიშნა ხუნდაძემ.