"დილით გადმოვარდა მესამე სართულიდან, მძიმე მდგომარეობაშია" - მუსიკოს დავით პაქსაშვილს საზოგადოების დახმარება ესაჭიროება

მუსიკოს დავით პაქსაშვილს, იგივე Ras Green-ს, რომელიც მესამე სართულიდან გადმოვარდა, საზოგადოების დახმარება ესაჭიროება. აღნიშნულთან დაკავშირებით ინფორმაციას მისი მეგობრები სოციალურ ქსელში ავრცელებენ, სადაც პაქსაშვილის დასახმარებლად ჯგუფია შექმნილი.

"უმაგრესი პირვონება და უნიჭიერესი რეპერი Ras Green დღეს დილით გადმოვარდა მესამე სართულიდან. ძალიან მძიმე მდგომარეობაში იმყოფება Jerars Clinic-ში. აქვს მრავალი მოტეხილობა და ესაჭიროება სამი ოპერაცია...

ვისაც შეგიძლიათ დახმარება Nick Green-ის (ნიკოლოზ ვერძეული) ანგარიშზე ჩარიცხეთ თანხა. ყოველი თეთრი მნიშვნელოვანია!!!" - წერს ჯგუფში გავრცელებულ ინფორმაციაში ალექსანდრე დგებუაძე.

დახმარების მსურველებს თანხის ჩარიცხვა შეუძლიათ ანგარიშზე: თიბისი / TBC : GE22TB7967045063600036

დავით პაქსაშვილმა მუსიკალური მოღვაწეობა 2010 წელს დაიწყო. იგი საზოგადოებამ უფრო ახლოს გაიცნო, როდესაც ტელეკომპანია "იმედის" ინტელექტუალურ თამაშში "ცოდნა ფულია" 25 ათასი ლარი მოიგო.

მაშინ აღელვებულმა ახალგაზრდამ აღნიშნა, მას ფული ალბომზე მუშაობის დასასრულებლად უნდოდა. დათო პაქსაშვილმა საზოგადოებას ისიც გაანდო, რომ იოგას სისტემით პროფესიული ვარჯიში სურს და გარშემოც ბევრი ისეთი ადამიანია, ვისაც მისი დახმარება სჭირდება.