რომელი დანაშაულები გაიზარდა და შემცირდა საქართველოში პანდემიის პერიოდში წინა წელთან შედარებით
პანდემიის პერიოდში საქართველოში კომპიუტერული დანაშაული გაიზარდა, თუმცა შემცირდა ნარკოდანაშაული და ოჯახში ძალადობის შემთხვევები.
AMBEBI.GE გთავაზობთ შინაგან საქმეთა სამინისტროს ანალიტიკური დეპარტამენტის მიერ წარმოებული სტატისტიკური მონაცემების ანალიზს.
მიმდინარე წლის სამი თვის მონაცემებით (თებერვალი, მარტი, აპრილი) რეგისტრირებული დანაშაულების ოდენობა 14 551-ს შეადგენს. ამას თუ 2019 წლის იმავე პერიოდს შევადარებთ, მონაცემები მცირედით შემცირებულია - გასულ წელს რეგისტრირებული დანაშაულების ოდენობამ 17 720 შეადგინა.
თუმცა, უნდა აღინიშნოს, რომ ზოგიერთი სახის დანაშაულის რიცხვი მიმდინარე წლის პირველ კვარტალში გასული წლის იმავე პერიოდთან შედარებით გაზრდილია.
- განზრახ მკვლელობა და განზრახ მკვლელობა დამამძიმებელ გარემოებებში (108-ე და 109-ე მუხლები)
2020 წლის იანვრიდან აპრილის ჩათვლით განზრახ მკვლელობის 40 ფაქტია დაფიქსირებული, გასული წლის იმავე პერიოდში კი გაცილებით ნაკლები, განზრახ მკვლელობის 24 შემთხვევა დაფიქსირდა.
- თვითმკვლელობამდე მიყვანა (115-ე მუხლი)
2020 წლის პირველ კვარტალში თვითმკვლელობამდე მიყვანის 88 დანაშაული აღირიცხა, გასული წლის იმავე პერიოდში კი ასეთი სულ 819 ფაქტი მოხდა.
- ჯანმრთელობის განზრახ მძიმე დაზიანება (117-ე მუხლი)
მიმდინარე წლის იანვარ-აპრილში ასეთი 74 ფაქტი დაფიქსირდა, ხოლო 2019 წლის პირველ კვარტალში - 61.
- ოჯახში ძალადობა (126 პრიმა მუხლი)
2020 წლის სამი თვის მონაცემებით, ოჯახში ძალადობის 1 735 ფაქტი დაფიქსირდა, ხოლო 2019 წლის იმავე პერიოდში ოჯახში ძალადობის 1981 შემთხვევა იყო რეგისტრირებული.
2020 წელს თებერვალი-აპრილის მონაცემებით, შემცირებულია ნარკოდანაშაულის მაჩვენებელიც. მიმდინარე წლის სამ თვეში ნარკოტიკების შეძენა-შენახვა-გასაღების 702 ფაქტი დაფიქსირდა, მაშინ როცა 2019 წლის იმავე პერიოდში დაფიქსირდა 1206 შემთხვევა.
- სატრანსპორტო დანაშაული
2020 წლის პირველ კვარტალში 1117 სატრანსპორტო დანაშაული (ავტოსაგზაო შემთხვევა) დაფიქსირდა, გარდაიცვალა 68 ადამიანი. 2019 წლის პირველ კვარტალში 1313 ასეთი დანაშაული აღირიცხა, რომელსაც 119 პირის სიცოცხლე შეეწირა.
- კომპიუტერული დანაშაული
წინა წელთან შედარებით, გაზრდილია კომპიუტერული დანაშაული. პანდემიის გააქტიურების პერიოდში, როგორც ჩანს, „ჰაკერებიც“ გააქტიურდნენ, რადგან 2020 წლის პირველ ოთხ თვეში საქართველოში 835 კომპიუტერული დანაშაული დაფიქსირდა, მაშინ როცა გასული წლის იმავე პერიოდში - 670 ასეთი ფაქტი მოხდა.
ვანო ზარდიაშვილის ცოლის ძმა პოლიციისთვის წინააღმდეგობის გაწევის ფაქტზე დააკავეს
სარალიძის მკვლელობისთვის მსჯავრდებულ გიორგი ჯანაშიას ათავისუფლებენ - მიხეილ კალანდიას ბიძა
