როგორ უნდა მოიქცეთ, თუ სალაროსთან დახლზე მითითებულ ფასზე ძვირს გახდევინებენ?

მაღაზიებსა თუ სუპერმარკეტებში შესულ მომხმარებელს ბევრი საკითხი უქმნის პრობლემას, იქნება ეს კონსულტანტთან ურთიერთობა, ვადაგასული პროდუქტი დახლზე, თუ ფასთა სხვაობა.

აღნიშნულ საკითხებზე "პალიტრანიუსის" გადაცემა "დღის თემის" ეთერში სტრატეგიული კვლევების და განვითარების ცენტრის მომხმარებლის უფლებების დაცვის პროგრამის ხელმძღვანელმა ვახტანგ კობალაძემ ისაუბრა.

• რა უნდა ქნას მყიდველმა, როცა დახლზე მითითებულ ფასზე მეტს ახდევინებენ სალაროსთან?

"პირველ რიგში, მომხმარებელი უნდა ეცადოს, რომ ადგილზევე, მაღაზიაში სანამ გადაიხდის საფასურს, მოითხოვოს პროდუქციის უკან დაბრუნება, ან ფასის შემცირება. თუკი მაღაზია უარს იტყვის ფასის ცვლილებაზე, მომხმარებელს აქვს უფლება უკან დააბრუნოს ნივთი. თუ უკვე მაღაზიიდან წამოვიდა მომხმარებელი, უფრო რთულია ამის დამტკიცება, თუმცა მას იურიდიულად აქვს უფლება მოითხოვოს ანაზღაურება. ამას ჭირდება მტკიცებულებები - ქვითარი და ფოტომასალა, რომ თაროზე სხვა ფასი იყო მითითებული.

საერთოდ, მეწარმის ვალდებულებაა აკონტროლოს ფასები დახლსა და სალაროში. სამწუხაროდ, არ არსებობს ზედამხედველი ორგანო, რომელიც მსგავს შემთხვევებში დაეხმარება მომხმარებელს რომ დაიბრუნოს ნივთის საფასური უკან" - ამბობს კობალაძე.

• ვადაგასული ან ვადიანი, თუმცა გაფუჭებული პროდუქტი დახლზე

კობალაძის თქმით, თუ მყიდველი მსგავს შემთხვევას დააფიქსირებს, უნდა იცოდეს, რომ მაღაზიას აქვს ვალდებულება ნებისმიერი ნაკლის შემთხვევაში დააბრუნოს თანხა ან შეცვალოს ის:

"თუ ნივთია უნდა შეკეთდეს, თუ სურსათია, უნდა დაიბრუნოს მაღაზიამ, ან შეუცვალოს, ან თანხა დაუბრუნოს.

თუ მომხმარებელი ხშირად აწყდება მსგავს შემთხვევას - ვადაგასული პროდუქტის გაყიდვას მაღაზიაში, უნდა მიმართოს სურსათის ეროვნულ სააგენტოს, რომელიც ვალდებულია მომხმარებლის თითოეულ მიმართვაზე მოახდინოს რეაგირება - მივიდეს მაღაზიაში, ნახოს შენახვის პირობები, დაინტერესდეს დისტრიბუციის და წარმოების ეტაპით, გამოავლინოს ხარვეზი და აღმოფხვრას ისინი.

• რა ხდება იმ შემთხვევაში, თუ მყიდველს მაღაზიაში ნივთი გაუტყდება?

"თუ ჩვენი უყურადღებობით გავტეხავთ ნივთს, რა თქმა უნდა უნდა ავანაზღაუროთ, თუმცა თუ ვთვლით, რომ ისე იყო განლაგებული ეს ნივთი, რომ სრულიად შემთხვევით გავტეხეთ - მაგალითად, იყო ვიწრო გასასვლელი და შუა ადგილას დალაგებული ბოთლები და ა.შ. ჩვენ გვაქვს უფლება, არ ავანაზღაუროთ ნივთის ღირებულება და მეწარმეს ამ შემთხვევაში ერთადერთი მექანიზმი რჩება - მიმართოს სასამართლოს, თუ სასამართლო დაადგენს, რომ მომხმარებელმა უნდა აანაზღაუროს ნივთის ღირებულება, მან უნდა აანაზღაუროს, თუ არ დაადგენს სასამართლო, მეწარმეს არ აქვს უფლებამოსილება აიძულოს მომხმარებელი დაზიანებული ნივთის ღირებულება გადაიხადოს.

მსგავსი სიტუაციის შემთხვევაში, თუ მყიდველი ვერ შეთანხმდება მაღაზიასთან, უნდა გამოიძახოს პატრული, რომელიც შეადგენს ოქმს, რაც იქნება გარკვეული მტკიცებულება. ასევე მყიდველს შეუძლია გადაიღოს, როგორ არის დალაგებული თაროები, რაც ასევე მტკიცებულებად გამოდგება" - განმარტა მომხმარებლის უფლებების დაცვის პროგრამის ხელმძღვანელმა ვახტანგ კობალაძემ.