რას ამბობს სოფო ხალვაში ბათუმის მერის თანამდებობიდან წასვლის შესახებ გავრცელებულ ინფორმაციაზე

ბათუმის მერის მოადგილე სოფო ხალვაში აცხადებს, რომ მას ლაშა კომახიძის თანამდებობიდან გადადგომის შესახებ ინფორმაცია არ აქვს.

ხალვაშის თქმით, წასვლის შესახებ მას არაფერი უთქვამს.

"ბათუმის მერის გადადგომაზე ინფორმაცია არ მაქვს, ტელევიზიებიდან გავიგე და დასაზუსტებლად მოვედი მერიაში. მერს დღეს ველაპარაკე, ჩვენ საქმიანი საუბარი გვქონდა ერთ-ერთ პროექტზე და წასვლის შესახებ მას არაფერი არ უთქვამს“, - აღნიშნა სოფო ხალვაშმა.

ინფორმაციას გამოეხმაურა „ერთიანი ნაციონალური მოძრაობის“ აჭარის ორგანიზაციის“ წევრი. გიორგი კირთაძის თქმით, მსგავსი ინფორმაცია ბევრჯერ გავრცელდა და მიზეზი შესაძლოა, მთავრობის თორნიკე რიჟვაძესთან დაპირისპირება იყოს.

"განცხადება არ მინახავს და არც არავის არ უნახავს, ალბათ, ორშაბათს იტყვიან. კომახიძე კი არა, პრემიერ-მინისტრები მიდიან განმარტების გარეშე. მის წასვლაზე ბევრჯერ თქვეს, მიზეზი შეიძლება, იყოს მისი დაპირისპირება თორნიკე რიჟვაძესთან, შესაძლოა უკავშირდებოდეს არჩევნებს ან ორივეს ერთად. ქალაქში არსებულ პრობლემებზე აპირებდნენ მასზე ხელისშეხოცვას", - განაცხადა „ნაციონალური მოძრაობის“ წევრმა გიორგი კირთაძემ.

ცნობისთვის, ბათუმის მერის გადადგომის შესახებ მედიაში ინფორმაცია დღეს გავრცელდა. მერიის პრესსამსახურში აცხადებენ, რომ ლაშა კომახიძეს განცხადება დაწერილი არ აქვს.