ვის დაურეკა გიორგი ქათამაძემ ხიდზე ჩხუბის შემდეგ და ვინ ჩამოიყვანა "მერსედესის" 2 მგზავრი თბილისში - შაქარაშვილის საქმის ახალი დეტალები

გიორგი შაქარაშვილის საქმესთან დაკავშირებით "კურიერი" ახალ დეტალებს ავრცელებს. "რუსთავი 2"-ის ინფორმაციით, სატელეფონო ანძების ჩანაწერებიდან ირკვევა, რომ 1:48 წუთზე, მაშინ, როდესაც არაგვის ხიდზე დაპირისპირება დასრულებულია, დაშავებული გიორგი ქათამაძე დაუკავშირდა დაკავებულ ჩიქოვანს, თუმცა რასთან დაკავშირებით მოხდა მათი კომუნიკაცია, ჯერჯერობით, უცნობია.

"კურიერისთვის" ასევე ცნობილი გახდა, რომ პირველი საათიდან ორ საათამდე გამვლელმა ავტომობილმა, "მერსედესის" მარკის ავტომობილიდან ერთ-ერთი არასრულწლოვანი ლ.შ თბილისში ჩამოიყვანა.

ირაკლი ახალაძე ერთ-ერთი მათგანია, რომელიც სწორედ იმ ავტომობილში იჯდა, რომლის მეშვეობითაც ორი პირი მცხეთიდან თბილისში ჩამოვიდნენ, მათ შორის, ერთ-ერთი არასრულწლოვანია.

"მცხეთასთან როდესაც გავიარეთ ხიდი, გზაზე დავინახეთ 2 ახალგაზრდა მამაკაცი. რომლებიც იქნევდნენ ხელს და ცდილობდნენ გაეჩერებინათ მანქანა. მე და გიორგიმ გავუჩერეთ აღნიშნულ პირებს მანქანა. როგორც მახსოვს ამ დროს იქნებოდა ღამის 01:00-დან 01:30-მდე. მანქანა გავაჩერეთ ხიდის გავლის შემდგომ დაახლოებით 10 მეტრში მარჯვენა მხარეს, მეორეხარისხოვან გზაზე. ის ბიჭები მოვიდნენ ჩვენთან და გვთხოვეს თბილისამდე ჩაყვანა. რაზეც გიორგი დაეთანხმა და ისინი დასხდნენ უკანა სავარძელზე... ბიჭებმა გვთხოვეს, თუ შეგვეძლო ისინი გაგვეყვანა "ნახალოვკაში" კიკვიძის ბაღის მიმდებარედ, რაზეც დავეთანხმეთ... ორი ახალგაზრდა იქნებოდა დაახლოებით 18-20 წლის ასაკის," - ნათქვამია ჩვენებაში.

გიორგი გაბრიჭიძე კი ის ადამიანია, რომელიც საჭესთან იჯდა და ახალგაზრდებს ავტომობილი გაუჩერა. ის ჩვენებაში აღნიშნავს, რომ მხოლოდ ერთი ახალგაზრდის ამოცნობა შეუძლია.

"ნახვის შემთხვევაში, შესაძლოა, ამოვიცნო მხოლოდ გრძელთმიანი პიროვნება. მოგახსენებთ, რომ არც გრძელთმიანი პიროვნების და არც მასთან მყოფი პირის მოყვანილობა არ მახსოვს და არ შემიძლია მათი აღწერა. მე მათი სახეები არ მახსოვს, რაც დამამახსოვრდა იყო მხოლოდ ის, რომ ერთი მათგანი იყო მაღალი და სუსტი და ჰქონდა გრძელი თმები," - ნათქვამია ჩვენებაში.

შეგახსენებთ, რომ 19 წლის ფეხბურთელის გარდაცვალების საქმეზე დაკავებულია 17 პირი, რაც შეეხება გამოძიებას, შეცვლილია მუხლის კვალიფიკაცია და გამოძიება განზრახ ჯგუფურად ჩადენილი მკვლელობის მუხლით მიმდინარეობს.