ავტორი:

"დასკვნაში ყველაფერი გამოჩნდება - დალია, დაალევინეს, ინექცია აქვს გაკეთებული, თუ..." - შეძლებს თუ არა ექსპერტიზის პასუხი 23 წლის პროგრამისტის გარდაცვალების მიზეზისთვის ფარდის ახდას?

"დასკვნაში ყველაფერი გამოჩნდება - დალია, დაალევინეს, ინექცია აქვს გაკეთებული, თუ..." - შეძლებს თუ არა ექსპერტიზის პასუხი 23 წლის პროგრამისტის გარდაცვალების მიზეზისთვის ფარდის ახდას?

23 წლის პროგრამისტის, თამარ ბაჩალიაშვილის გარდაცვალების ერთ-ერთ ვერსიად მედიკამენტოზური ინტოქსიკაცია განიხილება, რადგან ექსპერტ-კრიმინალისტებმა მის ავტომანქანაში, კონკრეტულად - ხელჩანთაში ანტიარითმიული საშუალება აღმოაჩინეს. შსს-ს ინფორმაციით, გაუჩინარებამდე ბაჩალიაშვილმა აფთიაქში მედიკამენტები შეიძინა. კითხვაზე - იყო თუ არა გარდაცვალების მიზეზი ინტოქსიკაცია, რომელი პრეპარატი და რა დოზა ჰქონდა გოგონას მიღებული, ამას დაახლოებით ერთ კვირაში ტოქსიკოლოგიური ექსპერტიზა უპასუხებს.

გავრცელებული ინფორმაციის თანახმად, ადგილზე ნაპოვნ მედიკამენტის ფირფიტას 20 აბი აკლდა. ეს პრეპარატი გულის საშუალებაა და ის სტენოკარდიის, ტაქიკარდიისა და გულის რითმის დარღვევის დროსაა რეკომენდებული. თემის ირგვლივ ambebi.ge წამების მსხვერპლთა ფსიქოლოგიური რეაბილიტაციის ცენტრ "ემპათიას" დირექტორს მარიამ ჯიშკარიანს ესაუბრა, რომლის სახელითაც ჩაერთო საქმის მსვლელობაში დამოუკიდებელი ექსპერტი გალინა კარმუშინა.

- ბაჩალიაშვილის ოჯახის მიერ მოწვეულმა დამოუკიდებელმა ექსპერტმა გალინა კარმუშინამ ალბათ ტყუილად არ ახსენა ტელეეთერში, რომ პრაქტიკაში ჰქონია შემთხვევები, როცა სამიზნისთვის იძულებით გაუკეთებიათ ინექცია და თვითმკვლელობის ინსცენირება მოუწყვიათ. ანუ არ გამორიცხავს, რომ ბაჩალიაშვილის შემთხვევაშიც შესაძლოა ამასთან გვქონდეს საქმე?

- ვიდრე გამოძიების მასალებს არ ვნახავთ, ძნელია ამის თქმა. ინექციის კვალის დადგენა ახლა შეუძლებელია, ერთადერთი - ტოქსიკოლოგიური ექსპერტიზა თუ რამეს ამოაგდებს. აღებულია ნიმუშები გარდაცვლილის სხვადასხვა ორგანოებიდან. მას ტაბლეტები თუ აქვს მიღებული, ის კუჭშიც გამოჩნდება, სისხლშიც და ყველა ნიმუშშიც. ინექცია ყველგან არ ჩანს და მისი დადგენა უფრო რთული პროცესია.

- თუ გავითვალისწინებთ იმასაც, რა მდგომარეობაში იყო გვამი, შესაძლებელია, რომ ტოქსიკოლოგიურმა ექსპერტიზამ არ ამოაგდოს მიღებული ნივთიერება და გაურკვეველი დარჩეს გარდაცვალების გამომწვევი მიზეზი?

- გააჩნია, რა ნივთიერებაა. ექსპერტიზა ზოგს აგდებს, ზოგს - არა. ასე ჯერ ვერ დავადგენთ, ყველაფერი გამოჩნდება ექსპერტიზის დასკვნაში - დალია, დაალევინეს, ინექცია აქვს გაკეთებული, სხვა პრეპარატი აქვს მიღებული, თუ - ავტომანქანაში ნაპოვნი. იმასაც გააჩნია, კიდევ რას აჩვენებს საგამოძიებო მასალები. ვინ იცის, შესაძლოა ნიმუშებში სხვა ნივთიერებებიც ნახოს ექსპერტიზამ. ზოგადად, ბევრი დასახელების წამლის დიდი დოზით მიღებამ შეიძლება სიკვდილი გამოიწვიოს. ტოქსიკოლოგიური ექსპერტიზა ნივთიერებასაც გამოავლენს და დოზასაც. ტოქსიკური ნივთიერების გამოვლენას რამდენიმე დღე სჭირდება. როცა ყველაფერი შეჯერდება - ექსპერტიზის პასუხები, მოწმეთა ჩვენებები და ა.შ, შემდეგ შეგვეძლება თამამად მსჯელობა სიკვდილის გამომწვევ მიზეზებზე.

- ადამიანს მეტაბლოკატორი თუ აქვს მიღებული, ვინაიდან ინტოქსიკაციასთან გვაქვს საქმე, გვამზე რაიმე კვალს ტოვებს? ანუ აქვს რაიმე მახასიათებელი?

- არა, ეს მედიკამენტი არანაირ კვალს არ ტოვებს, თუმცა მაგ გაზით მოწამლულს გამონაყარი ახასიათებს. მეტაბლოკატორის დიდი დოზა წნევას დაბლა სცემს და გული ჩერდება. კანზე რამე რომც ყოფილიყო, ცხედარი ისეთ მდგომარეობაში იყო, იქ რამის გარჩევა შეუძლებელია. წარმოიდგინეთ, გარდაცვლილი მე-5 დღეს ნახეს, თან სიცხეში იმყოფებოდა. ექსპერტმა სიკვდილის ხანგრძლივობად 3-5 დღე დაწერა. სავარაუდოდ, როცა დაიკარგა, გოგონა იმავე დღეს გარდაიცვალა. ის, რომ ცხედარს ფიზიკური ძალადობის ნიშნები არ აღენიშნება, არ ნიშნავს იმას, რომ მასზე არ უძალადიათ. ძალადობა ფართო ცნებაა და სხვადასხვა სახის არსებობს, მათ შორის - ფსიქოლოგიურიც.

- სუიციდის ვერსიას იზიარებთ? და თუ გოგონას ეს ჰქონდა გადაწყვეტილი, ათეულობით კილომეტრზე რატომ წავიდოდა მიზნის სისრულეში მოსაყვანად?

- როცა ადამიანს თავისი გეგმა აქვს, იმ გეგმას მიჰყვება. პრინციპში, ამას ვერ გამოვრიცხავთ. შესაძლოა, სუიციდის ადგილთან ადამიანს აკავშირებდეს რაიმე მოგონება, ნამყოფი იყოს იმ ადგილზე და იქ გადაწყვიტოს თვითმკვლელობა. ამას ჩვენ ვერ გავიგებთ...

- გამორიცხავთ მუხლის კვლავ გადაკვალიფიცირებას?

- არაფერია გამორიცხული, სამივე ვერსია დასაშვებია - მკვლელობაც, თვითმკვლელობაც და თვითმკვლელობამდე მიყვანაც. დაველოდოთ გამოძიებას რა მასალებს დადებს და რა გამოიკვეთება დროთა განმავლობაში.

ნანა ფიცხელაური

"დაამტკიცა, რომ იმ დღეს საერთოდ არ იყო გასული მცხეთის ტერიტორიაზე" - შსს-ში "კაწროს" მეგობრის, დაჩი ბუაძის გამოკითხვა დასრულდა

თამარ ბაჩალიაშვილის საქმე ცენტრალური კრიმინალური პოლიციის დეპარტამენტს გადაეცა

"არაფერს, რასაც თქვენ აკეთებთ, არ ძალუძს ჩემი დამცირება... ჩემი დამცირება, მხოლოდ მე შემიძლია" - რა თქვა გიორგი რურუამ საბოლოო სიტყვაში