"ვფიქრობ, "ფეისბუქის" გატეხვა სხვა კომპიუტერიდან შესაძლებელია" - როგორ ხსნის ბაჩალიაშვილის ბიძა ფაქტს, რომ სოცქსელში პროგრამისტის პროფილი აღარ იძებნება

"ფეისბუქზე" 23 წლის თამარ ბაჩალიაშვილის პროფილი აღარ იძებნება. ოჯახის წევრები ამ ფაქტს გარდაცვლილი პროგრამისტის საქმის მიმართ საზოგადოების დიდ ინტერესსა და გამოძიებას უკავშირებენ.

"ამის შესახებ ჩვენ არაფერი ვიცოდით. გუშინ ვათვალიერებდი თამუნას "ფეისბუქ-გვერდს", ჩეულებრივ შევედი, პროფილის სურათიც იყო და ჩვეულებრივი წვდომა მქონდა. როდესაც თქვენს გადაცემაში მოვდიოდი, მაშინ შემატყობინეს მეც ეს ამბავი... რადგან საქმე არის გამოძიების პროცესში, რადგან არის ძალიან დიდი დაინტერესება თამარ ბაჩალიაშვილის საქმესთან დაკავშირებით, ვფიქრობ სპეციალურად არის გაუქმებული გამოძიების მიერ, რომ გულდასმით იქნეს შესწავლილი.

რატომღაც მგონია, რომ "ფეისბუქ-გვერდზე" წვდომა, გატეხვა ან შესვლა სხვა კომპიუტერიდან შესაძლებელია, ეს ჩემი აზრია, რა თქმა უნდა. თამუნას სამუშაო ნოუთბუქის გახსნა გაუჭირდათ, რთული პაროლის გამო, მაგრამ რატომღაც მგონია, რომ "ფეისბუქის" პაროლის გატეხვა გარეგანი ძალებითაც შესაძლებელია", - ამის შესახებ თამარ ბაჩალიაშვილის ბიძამ, კობა თამაზაშვილმა "TV პირველის" ეთერში განაცხადა.

• "ეს იყო ჩხვლეტა, გამჭოლი ჭრილობა, თუ რის გამო დადგა სიკვდილი ძალიან მაინტერესებს" - თამარ ბაჩალიაშვილის ბიძა

ცნობისთვის, თამარ ბაჩალიაშვილის ოჯახის ადვოკატი მიხეილ რამიშვილი სამხარაულის ექსპერტიზის ბიუროში იმყოფება.

როგორც რამიშვილი აცხადებს, ექსპერტიზის ბიუროში, გარდაცვლილის კუთვნილი კომპიუტერი მისი თანდასწრებით უნდა გაიხსნას.

შეგახსენებთ, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი სათვალთვალო კამერებმა ბოლოს თეთრიწყაროს რაიონში დააფიქსირეს. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს.

ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.