ნინო ამირანაშვილი სკოლის დირექტორის პოსტზე ცხინვალის ე.წ. სასამართლომ აღადგინა  - ის წეროვნელი ბავშვების სკოლიდან არგარიცხვისთვის გაათავისუფლეს

ახალგორის №1 საშუალო სკოლის დირექტორი, ნინო ამირანაშვილი თანამდებობაზე აღადგინეს. ინფორმაციას ამის შესახებ ekhokavkaza.com ავრცელებს.

როგორც გამოცემასთან ახალგორელი აქტივისტი, თამარ მეარაყიშვილი ამბობს, დირექტორის თანამდებობაზე აღდგენის გადაწყვეტილება ცხინვალის ე.წ. საქალაქო სასამართლოს მოსამართლემ, ფატიმა პარასტაევამ მიიღო.

მეარაყიშვილის ინფორმააციით, ადგილობრივ განათლების განყოფილებას დაევალა, დირექტორს აუნაზღაურონ ის ხელფასი, რომელიც თანამდებობიდან იძულებით გათავისუფლების შემდეგ დაკარგა, ასევე მისცენ 10 ათასი რუბლი მიყენებული მორალური ზიანისთვის.

ცნობისთვის, ნინო ამირანაშვილი დირექტორის პოსტიდან 2020 წლის 3 თებერვალს მას შემდეგ გაათავისუფლეს, რაც წეროვნის დევნილთა დასახლებიდან ახალგორში გადასული მოსწავლეების სკოლიდან გარიცხვაზე უარი თქვა.