"ბაჩალიაშვილის საქმეზე შუალედური ინფორმაციის გავრცელების შემდეგ შსს-ს გვერდზე "ბოტები" გააქტიურდნენ" - რა ვიდეოს აქვეყნებს უწყება

"შინაგან საქმეთა სამინისტროს ინფორმაციით, მას შემდეგ რაც მათ ოფიციალურ ფეისბუქ-გვერდზე თამარ ბაჩალიაშვილის საქმის მიმდინარეობასთან დაკავშირებით შუალედური ინფორმაცია გავრცელდა, ე.წ. "ბოტები" გააქტიურდნენ.

ამის შესახებ შსს-ს სტრატკომის განცხადებაშია ნათქვამი.

"გუშინ, 5 აგვისტოს, შინაგან საქმეთა სამინისტრომ საზოგადოებას მიაწოდა თამარ ბაჩალიაშვილის საქმის გამოძიების მიმდინარეობასთან დაკავშირებით შუალედური ინფორმაცია. შინაგან საქმეთა სამინისტროს ოფიციალურ ფეისბუქ-გვერდზე განცხადების გამოქვეყნებისთანავე, ე.წ. "ბოტები“ გააქტიურდნენ. კერძოდ, ე.წ. „ბოტები“ გამოხატავდნენ გაბრაზების რეაქციებს გამოქვეყნებულ ინფორმაციაზე.

ამ დროის მონაცემებით, სულ დაფიქსირებულია 700-მდე ე.წ. „ბოტის“ აქტიურობა. შინაგან საქმეთა სამინისტროს განცხადებაზე გუშინ დაფიქსირებულ ე.წ. “ბოტებს“ საცხოვრებელ ადგილად ძირითადად მითითებული აქვთ ინდოეთი და აზიის სხვა ქვეყნები.

მათ შორის არიან, მაგალითად: „იტზ ვაიშუ პატილ”, "სანჯუ საჯი", "რაუს პალ" და სხვა. გარკვეული ჯგუფები საკუთარი ინტერესების გამო, ე.წ. „ბოტების“ გამოყენებით ცდილობენ საზოგადოებრივ აზრზე ზეგავლენას და გამოძიების მიმდინარეობის დისკრედიტაციას" - ნათქვამია განცხადებაში, რომელსაც თან ვიდეო ახლავს.

ცნობისთვის, საქართველოს შინაგან საქემთა სამინისტრო თამარ ბაჩალიაშვილის საქმის გამოძიების მიმდინარეობასთან დაკავშირებით შუალედური ინფორმაცია გუშინ გამოაქვეყნა.

ექსპერტიზის დასკვნის თანახმად, თამარ ბაჩალიაშვილის კუთვნილი „ეფლის“ მარკის პორტატული კომპიუტერის მეხსიერებაში აღმოჩენილი იქნა ფოტო-ვიდეო ფაილები და კომპიუტერის მეხსიერებაში ვებგვერდებზე შესვლის ისტორია.

ექსპერტიზის დასკვნის და დათვალიერების ოქმის თანახმად, 2020 წლის 17 ივლისს, გაუჩინარების წინა დღეს 18:36 საათზე თამარ ბაჩალიაშვილი შესულია „ფეისბუქის“ გვერდის დახმარების განყოფილებაში, სადაც მითითებულია არის ვებ გვერდის სათაური - What will happen to my Facebook account if I pass away?, რაც ქართულად ნიშნავს - რა მოუვა ჩემს ფეისბუქის ანგარიშს თუ მე გარდავიცვლები? ამავე წუთზე გუგლში თამარ ბაჩალიაშვილის მიერ ჩაწერილი და მოძებნილია შემდეგი ტექსტი facebook cancel account after death - რაც ნიშნავს: ფეისბუქის ანგარიშის გაუქმება სიკვდილის შემდეგ.

ვრცლად წაიკითხეთ: "თამარ ბაჩალიაშვილი გაუჩინარებამდე 1 თვით ადრე ინტერნეტში ეძებდა სტატიებს თვითმკვლელობის გზების შესახებ" - შსს