"ოჯახს აჩვენეს კამერის ჩანაწერი, რომელშიც ჩანს, როგორ გამოდიან ახალგაზრდები ბარიდან და ლაღად მიუყვებიან ქუჩას"

15 აგვისტოს გაუჩინარებული "ბაუჰაუს ბარის" თანამშრომლების - გიორგი შალამბერიძისა და ბაია ბერუაშვილის ცხედრრები სამდღიანი ძებნის შემდეგ, ორშაბათს იპოვეს მტკვარში. მაშველებმა ჯერ გოგონას, რამდენიმე წუთის შემდეგ კი ახალგაზრდა მამაკაცის ცხედარი აღმოაჩინეს.

ახალგაზრდების სიკვდილის მიზეზს ექსპერტიზა დაადგენს, მანამდე კი გარდაცვლილი ბაია ბერუაშვილის ოჯახისთვის მთავარ ვერსიად უბედური შემთხვევა განიხილება.

ambebi.ge-ს ბაია ბერუაშვილის ოჯახის ახლობელი ესაუბრა, რომლის თქმითაც:

"გარდაცვლილი გოგონას ოჯახი დარწმუნებულია, რომ საქმე უბედურ შემთხვევასთან გვაქვს, ყოველ შემთხვევაში, ექსპერტიზის დასკვნამდე ისინი ასე ფიქრობენ. ახალგაზრდები მოაჯირზე ისხდნენ, რა დროსაც ჯერ გოგონა გადავარდა, შემდეგ კი მას ვაჟი გადაჰყვა. ოჯახს აჩვენეს სათვალთვალო კამერის ჩანაწერის ის მონაკვეთი, რა დროსაც ახალგაზრდები გამოდიან ბარიდან და ლაღად მიუყვებიან ქუჩას".

ახლობელისავე თქმით, იმ ადგილას, სადაც ახალგაზრდები ჩაცვივდნენ, წყალი მდორეა და ამიტომაც არ წაუღია მდინარის დინებას მათი ცხედრები. როგორც ახლობელი ამბობს, ოჯახის წევრებს ახალგაზრდა გოგონას სხეულზე არანაირი დაზიანება არ შეუნიშნავთ.

ბაია ბერუაშვილს შაბათს თერჯოლის მუნიციპალიტეტის სოფელ ეწერში დაკრძალავენ.