საქართველოში კორონავირუსის 17 ახალი შემთხვევა გამოვლინდა, მათ შორის 11 ე.წ. ლენჯერის კლასტერს უკავშირდება

საქართველოში კორონავირუსის 17 ახალი შემთხვევა გამოვლინდა და ინფიცირებულთა რაოდენობა 1 411 გახდა. ამის შესახებ ინფორმაცია მთავრობის სპეციალურ ვებგვერდ stopcov.ge-ზე გამოქვეყნდა. გამოჯანმრთელებულთა რიცხვი არ შეცვლილა და კვლავ 1132-ია.

ახალი შემთხვევებიდან 11 ე.წ. ლენჯერის კლასტერს უკავშირდება. ამის შესახებ „ინტერპრესნიუსს“ ინფექციური საავადმყოფოდან აცნობეს. მათივე ცნობით, 1 დადასტურებულ შემთხვევასთან კონტაქტია, 5 კი იმპორტირებული შემთხვევაა, საიდანაც 3 სატვირთო ავტომობილის მძღოლია.

კარანტინის რეჟიმში იმყოფება 6848 მოქალაქე, სტაციონარში მეთვალყურეობის ქვეშ – 269.

უცხოეთიდან სამკურნალოდ გადმოყვანილია საქართველოს 41 მოქალაქე.

კორონავირუსის შედეგად ქვეყანაში 17 პაციენტი გარდაიცვალა.