"ჩემი ტრაგედიიდან გამომდინარე, კაცებს მინდა ვუთხრა, უყვარდეთ მეუღლეები და შვილები" - გელა დაიაური

"ჩემი ტრაგედიიდან გამომდინარე, კაცებს მინდა ვუთხრა, უყვარდეთ მეუღლეები და შვილები" - ამის შესახებ მუსიკოსმა გელა დაიაურმა "ტვ პირველის" ეთერში განაცხადა, სადაც ოჯახის მნიშვნელობაზე ისაუბრა.

"დღეს მე ძალიან მიკვირს ოჯახების დანგრევა, ეს ძალიან დიდი პრობლემაა. ძალიან იოლად ხდება ეს ყველაფერი. მიდიან სარჩოს საშოვნელად საზღვარგარეთ. საქართველოში ვერ იმუშავებ, ხელფასით და შენი შრომით, ისეთ დაბალი ანაზღაურებაა, რომ ვერ იარსებებ, ეს სიშორე იწვევს უკვე გაციებას ურთიერთობას.

მეორეც, ბავშვის ფსიქოლოგიაზეც მოქმედებს ეს ყველაფერი. არ არსებობს ოჯახი, დედას და მამას რომ არ ეკამათოთ. პატარა რარაცაც მოქმედებს ბავშვზე. მშობლებიც უნდა დაფიქრდნენ, რით შეიძლება გადარჩინონ ბავშვის ფსიქოლოგია. იქნებ ჯობდეს, რომ არ წავიდნენ.

ისე უნდა გიყვარდეს მეუღლე, როგოც უფალს უყვარს ტაძარი და ისე უნდა გყვარს ქმარი, როგორც ტაძარს უყვარს უფალი. ეს ორმხრივი სიყვარულია და აქ ძალადობაზე საუბარი არ უნდა იყოს. ჩემი ტრაგედიიდან გამომდინარე, კაცებს მინდა ვუთხრა, უყვარდეთ მეუღლეები და შვილები. ყოველთვის უნდა იფიქრონ, რომ შეიძლება რაღაც მოხდეს ამ ქვეყანაზე, ყველას ჯვარი სწერია. მოეფერონ და თბილები იყვნენ ოჯახის წევრების მიმართ" - განაცხადა დაიაურმა.

შეგახსენებთ, 2010 წლის 22 ივლისს მთელი საქართველო შეძრა და დაამწუხრა მუცოს ხეობაში დატრიალებულმა ტრაგედიამ - "ჯიპის" მარკის ავტომობილი, სადაც 10 ადამიანი იჯდა, გზიდან გადავარდა, ავტოკატასტროფამ 7 ადამიანის, მათ შორის - 3 მცირეწლოვანი ბავშვის სიცოცხლე იმსხვერპლა.

დაიღუპნენ გელა დაიაურის მეუღლე, ნიჭიერი მომღერალი და პოეტი თეონა ქუმსიაშვილი და მისი ორი ვაჟი - დემეტრე და ჯარჯი, თეონას და - ნათია, გელა დაიაურის მეჯვარე ბერდია არაბული, მისი მეუღლე სოფო ღოღობერიძე და მათი ვაჟი - მამუკა. საუბედუროდ, დემეტრე დაიაური და მამუკა არაბული ადიდებულმა მდინარე არღუნმა გაიტაცა, ვერ იპოვნეს. თვითონ გელა დაიაური, თეონას ძმა თორნიკე ქუმსიაშვილი და დაიაურებისა და არაბულების მეგობარი თეონა ჭინჭარაული გადარჩნენ.