"ღმერთმა ქნას, ბევრი ქორწილი იყოს და ბევრი ბავშვი დაიბადოს, მაგრამ პანდემიის პერიოდში შევიკავოთ თავი დიდი თავყრილობებისგან" - ამირან გამყრელიძე

ბოლო 10 დღის განმავლობაში ქვეყანაში ახალი შემთხვევების დინამიურად ზრდის ტენდენცია გვაქვს, - ამის შესახებ დაავადებათა კონტროლის ეროვნული ცენტრის დირექტორმა ამირან გამყრელიძემ მთავრობის საკოორდინაციო საბჭოს სხდომის შემდეგ გამართულ ბრიფინგზე ეპიდსიტუაციაზე საუბრისას განაცხადა.

როგორც მან აღნიშნა, ქვეყანაში არსებული ეპიდსიტუაცია კონტროლირებადია.

"ჯერჯერობით, რა თქმა უნდა, მწვანე ზონაში ვართ. კიდევ ერთხელ ვუსვამ ხაზს, გვაქვს კონტროლირებადი და სრულად მართვადი ეპიდსიტუაცია, მაგრამ ეს არ ნიშნავს, რომ ჩვენ თვითდამშვიდებული უნდა ვიყოთ, რადგანაც ზრდის ტენდენცია არის, რომელიც პროგნოზირებადი იყო, რადგან შიდა ტურიზმის ძალიან აქტიური სეზონი გამოვიარეთ, განსაკუთრებით აჭარაში", - განაცხადა გამყრელიძემ.

გამყრელიძის თქმით, ქორწილების აღნიშვნა უნდა ხდებოდეს, მაგრამ საჭიროა დიდი მასშტაბებისგან თავის შეკავება, რადგან ეს დიდი რისკის შემცველია.

„დიდი შეკრებები აჭარაში პრობლემატურია. ჩვენ ახლა, ამ 3 დღის განმავლობაში, გურიაში - ოზურგეთისა და ჩოხატაურის მუნიციპალიტეტებში 6 შემთხვევა გვაქვს. 6-ვე შემთხვევა ბათუმში დიდ ქორწილთან არის დაკავშირებული. ღმერთმა ქნას, ბევრი ქორწილი იყოს ქვეყანაში და ბევრი ბავშვი დაიბადოს, მაგრამ ამ პანდემიის პერიოდში შევიკავოთ თავი დიდი თავყრილობებისგან. რა თქმა უნდა, ქორწილის შესაბამისი აღნიშვნა უნდა იყოს, მაგრამ არ შეიძლება 300 და 400 კაციანი იყოს, რომელიც ძალიან მომატებული რისკია“, - განაცხადა გამყრელიძემ.