"წყარო უცნობია, ვდარდობ იმ ადამიანებზე, ვისთანაც კონტაქტი გვქონდა" - ლევან გოგიჩაიშვილს და მის მეუღლეს კორონავირუსი დაუდასტურდათ

დეპუტატ ლევან გოგიჩაიშვილსა და მის მეუღლეს, "ტვ პირველის" თანამშრომელს ვიკა ბუკიას, კორონავირუსი დაუდგინდათ. ინფორმაცია ამის შესახებ ვიკა ბუკიამ "ფეისბუქზე" გამოქვეყნებულ პოსტში დაადასტურა.

"მეგობრებო და ჩემო კოლეგებო, გიდასტურებთ. უბრალოდ ფიზიკურად შეუძლებელია ამდენ ზარს და შეტყობინებას ვუპასუხო. თავს კარგად ვგრძნობთ, მხოლოდ ვდარდობ იმ ადამიანებზე, ვისთანაც ბოლო 2-3 დღის განმავლობაში გვქონდა მჭიდრო კონტაქტი. აუცილებლად უნდა მოხდეს ამ კონტაქტების კვლევა. როგორც კი საეჭვო სიმპტომები გამოგვივლინდა დაუყოვნებლივ მივიღეთ ზომები.

წყარო სრულიად უცნობია. არანაირ საეჭვო კლასტერთან არ გვქონია კავშირი. ვეცდებით ესეც გამოვარკვიოთ.

მადლობა ყველას" - წერს ბუკია.

რაც შეეხება დეპუტატის კონტაქტებს, ლევან გოგიჩაიშვილი ამბობს, რომ ის ბოლო დღეებში პარლამენტში იმყოფებოდა.

"დილით გავიღვიძე სიცხით, ეგრევე გავარდი და ტესტი გავიკეთე. თავიდან კარგი პასუხი მოვიდა. მერე მითხრეს საეჭვოა ეგ ამბავი და ტესტი ხელმეორედ გაიკეთეო. დღეს დილით იყვნენ მოსულები და რომ გამიკეთეს ტესტი, მემგონი დადებითია. ველოდები პასუხს, სად გადაგგვიყვანენ.

მე საიდან გადამედო, არ ვიცი. პარლამენტში ორშაბათს, სამშაბათს და ოთხშაბათს ზუსტად ვიცი, რომ ვიყავი" - ამბობს გოგიჩაიშვილი "რუსთავი 2"-სთან საუბრისას.