"მეც მაქვს პრობლემები ოჯახში... შვილიშვილები მეუბნებიან, რატომ არ გვიშვებ სკოლაშიო, ჰგონიათ, მე არ ვუშვებ" - ამირან გამყრელიძე

დაავადებათა კონტროლის ეროვნული ცენტრის ხელმძღვანელის ამირან გამყრელიძის თქმით, საქართველოს 6 დიდ ქალაქში ორკვირიან დისტანციურ სწავლებაზე გადასვლა მიზანშეწონილია.

ამის შესახებ მან "ღამის კურიერის" ეთერში განაცხადა.

"მესმის მშობლების, ჩემი რამდენიმე შვილიშვილი სკოლის მოწაფეა და მაქვს ეს პრობლემები ოჯახშიც, რომ რატომ არ წავედით სკოლაში, რატომ არ გვიშვებო... ჰგონიათ, რომ მე არ ვუშვებ სკოლაში.

მოგეხსენებათ, საქართველოში სწავლას იწყებდა 120-140 ათასი სტუდენტი და დაახლოებით ნახევარ მილიონზე მეტი სკოლის მოწაფე. ეს არის ძალიან სერიოზული მობილობის ზრდა რამდენიმე დღეში. ჩვენ კარგად ჩავაბარეთ გამოცდა, როდესაც ეროვნული გამოცდები ჩავატარეთ.

ახლა მართალი გითხრათ, როცა ზრდა გვქონდა ბოლო 6 დღის განმავლობაში, ასეთი დიდი მობილობა ცოტა შემაშფოთებელი იყო, დიდი მასა ამ 6-7 ქალაქშია. ამიტომ ორკვირიან დისტანციურ სწავლებაზე გადასვლა მიზანშეწონილად იქნა მიჩნეული," - განაცხადა ამირან გამყრელიძემ.

როგორც NCDC-ის ხელმძღვანელმა აღნიშნა, ჯერჯერობით, გამონაკლისის დაშვება არ იგეგმება არც პირველკლასელებისთვის.