"საკალმახის ტერიტორიაზე გატყუებას ადგილი არ ჰქონია" - პროკურორი განმარტავს, სად იყო თამარ ბაჩალიაშვილის დანიშნულების ბოლო პუნქტი

პროკურორ ამირან გულუაშვილის განცხადებით, თამარ ბაჩალიაშვილის ე.წ საკალმახის ტერიტორიაზე გატყუებას ადგილი არ ჰქონია, რასაც მისი გადაადგილების მარშრუტიც ადასტურებს.

ამის შესახებ პროკურორმა „პალიტრანიუსის“ გადაცემაში „360“გრადუსი განაცხადა.

გულუაშვილის თქმით, თამარ ბაჩალიაშვილის დანიშნულების ბოლო პუნქტი ის ადგილი იყო, სადაც 22 ივლისს მისი ავტომობილი იპოვეს.

"არანაირ გატყუებას ამ შემთხვევაში ადგილი არ ჰქონია ე.წ საკალმახის ტერიტორიაზე ან სხვა ობიექტზე, რომელიც ბოლო პერიოდში მედია საშუალებების მიერ სახელდებოდა. დანიშნულების ბოლო პუნქტი იყო ის ადგილი, სადაც 22 ივლისს იქნა აღმოჩენილი თამარ ბაჩალიაშვილის ავტომობილი.

თუმცა, მოცემულ შემთხვევაში ამოსავალი წერტილი არის მარშრუტის უტყუარობა, რომ თამარ ბაჩალიაშვილი თავის ავტომანქანით გადაადგილების დროს ამ გზაზე არ ყოფილა და არც საკალმახის, ისევე როგორც სხვა ნებისმიერი ნახსენები ობიექტის მიმდებარე ტერიტორიაზე არ ყოფილა თავისი ავტომობილით“, - განაცხადა გულუაშვილმა.

ცნობისთვის, თამარ ბაჩალიაშვილი 18 ივლისს გაუჩინარდა. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.