"უკრაინის გენპროკურორის ერთ-ერთი მრჩეველი ნასამართლევია და მსჯავრი მოხდილი არ აქვს. ეს ზურაბ ადეიშვილია" - სვიატოსლავ პისკუნი
უკრაინელმა სახელმწიფო მოღვაწემ სვიატოსლავ პისკუნმა - სამგზის ექსგენერალურმა პროკურორმა ლეონიდ კუჩმასა და ვიქტორ იუშენკოს პრეზიდენტობის დროს - ინტერვიუ მისცა უკრაინის პოპულარულ გამოცემას "სტრანას" («Страна»), რომელშიც იგი საუბრობს, თუ როგორ მოხდა მისი მიწვევა-დანიშვნა უკრაინის ამჟამინდელი გენერალური პროკურორის ირინა ვენედიქტოვას მრჩევლად და რატომ გადადგა იგი თანამდებობიდან ერთი თვის შემდეგ. სხვათა შორის, ამ ფაქტმა უკრაინის საზოგადოებაში ხმაური და მითქმა-მოთქმა გამოიწვია.
ინტერვიუში სვიატოსლავ პისკუნი აღნიშნავს, რომ ირინა ვენედიქტოვა სწორად აზროვნებს - მან იცის რაც სურს, მაგრამ არ იცის, როგორ უნდა მიაღწიოს მიზანს. ამასთან, სვიატოსლავ პისკუნს არ მოსწონს, რომ გენპროკურორის ერთ-ერთ მრჩევლად თურმე... ყოფილი უცხოელი გენპროკურორიც მუშაობს. აღსანიშნავია, რომ ეს ფაქტიც გახდა თანამდებობიდან სვიატოსლავ პისკუნის გადადგომის ერთ-ერთი მიზეზი.
"უკრაინაში ამჟამად ბევრი სისხლის სამართლის საქმეა დაუმთავრებელი და "ჰაერში დაკიდებული" - დაახლოებით ხუთ მილიონამდე. პროკურატურას კადრები არ ჰყოფნის, მაღალია კორუფციის დონე... ამიტომ გენპროკურორს წერილით მივმართე - დანაშაულის გამოძიებისა და სამართალდაცვის სფეროში გამოცდილების გაზიარების მიზნით. შემხვდა, მესაუბრა და მრჩევლად დანიშვნა შემომთავაზა... მეგონა, რომ მე, როგორც მრჩეველს, ჩვეულებრივად, ირინა ვენედიქტოვასთან კავშირი მუდმივად მექნებოდა. მაგრამ... მხოლოდ დანიშვნის შემდეგ გავიგე, რომ მას ჩემს გარდა, თურმე კიდევ 8 მრჩეველი ჰყოლია. ჩემთვის მოულოდნელი იყო, რომ ირინა ვენედიქტოვას სხვა მრჩევლებთან ერთად, საქართველოს მოქალაქეც მუშაობს, რომელიც ნასამართლევია და მსჯავრი მოხდილი არ აქვს", - ამბობს სვიატოსლავ პისკუნი ინტერვიუში.
ჟურნალისტის კითხვაზე - "ვინ გყავთ მხედველობაში?", იგი პასუხობს:
"ეს ზურაბ ადეიშვილია. თუ გახსოვთ, მიხეილ სააკაშვილის პრეზიდენტობის დროს იგი საქართველოს სამართალდამცავი სისტემის ერთ-ერთი ხელმძღვანელი გახლდათ, რომელსაც მოგვიანებით საქართველოში რიგი დანაშაულებების ჩადენის გამო, განაჩენი მისსავე "რეფორმირებულმა" ქართულმა სასამართლომ გამოუტანა".
ავტორი სიმონ კილაძე