ავტორი:

კორონავირუსის მეორე ტალღა: ევროპის რომელ ქვეყნებში იზრდება ინფიცირების შემთხვევები და სად არის შედარებით სტაბილური ვითარება

კორონავირუსის მეორე ტალღა: ევროპის რომელ ქვეყნებში იზრდება ინფიცირების შემთხვევები და სად არის შედარებით სტაბილური ვითარება

კორონავირუსის პანდემია მსოფლიოს ახალი ძალით უტევს და სხვადასხვა ქვეყნების ხელისუფლების წარმომადგენლები უკვე ვირუსის ახალი ძალით აფეთქებასა და მეორე ტალღაზე საუბრობენ.

ინფიცირების პირველი პიკი ევროპაში ამ წლის გაზაფხულზე იყო. დაწესებულმა შეზღუდვებმა შედეგი გამოიღო და ზაფხულში, მთელი ევროპის მასშტაბით, ახალ ინფიცირებულთა რიცხვი მკვეთრად შემცირდა. თითქმის ყველა ქვეყანამ ეტაპობრივად მოხსნა შეზღუდვები. ადამიანები კი, გარკვეულწილად, ჩვეულ ცხოვრებას დაუბრუნდნენ.

ეპიდემიოლოგები ზაფხულშივე პროგნოზირებდნენ ვირუსის მეორე ტალღას, ხოლო ჯანდაცვის მსოფლიო ორგანიზაციაში აცხადებდნენ, რომ მეორე ტალღა გაცილებით სახიფათო იქნებოდა.

  • როგორი ვითარებაა ევროპაში დღეს?

აგვისტოს მიწურულიდან დღემდე, ევროპის ბევრ ქვეყანაში, ყოველდღიურად ახალი ინფიცირებულების რეკორდულ რაოდენობას აღწერენ.

როგორც "ევრონიუსი“ წერს, ისეთი ქვეყნები, როგორებიცაა ალბანეთი, ბულგარეთი, ჩეხეთი, მონტენეგრო და ჩრდილოეთ მაკედონია, აგვისტოსა და სექტემბერში, გაცილებით რთული ვითარების წინაშე აღმოჩდნენ, ვიდრე გაზაფხულზე იყვნენ, როცა სხვა ქვეყნებთან შედარებით პანდემიას თავს წარმატებით ართმევდნენ. ჩამოთვლილ ქვეყნებში ინფიცირების დღიური მაჩვენებელი მკვეთრად გაზრდილია.

ბელგია, დიდი ბრიტანეთი, საფრანგეთი, ესპანეთი ევროპის ის ქვეყნებია, რომლებსაც COVID-19-მა დიდი ზიანი მიაყენა გაზაფხულზე, თუმცა მდგომარეობა ამ ქვეყნებში კვლავ გართულდა და ზოგიერთ მათგანში კორონავირუსის რეკორდული რაოდენობა ახლახანს გამოვლინდა.

  • საფრანგეთში გასულ შაბათს კორონავირუსის 13 498 ახალი შემთხვევა აღწერეს და ეს პანდემიის დასაწყისიდან დღემდე ყველაზე მაღალი მაჩვენებელია საფრანგეთისთვის. ასზე მეტ სკოლაში კვლავ კარანტინი გამოცხადდა და მოსწავლეები ისევ დისტანციური სწავლების რეჟიმზე გადავიდნენ.
  • გაერთიანებულ სამეფოში შემოდგომიდან მკვეთრად მოიმატა კორონავირუსის ახალმა შემთხვევებმა. გასულ 24 საათში დიდ ბრიტანეთში ვირუსის 6 128 შემთხვევა გამოვლინდა. რეკორდული მაჩვენებელი 10 აპრილს იყო, როცა 7 860 ინფიცირებული აღწერეს, გუშინდელი მონაცემები კი ყველაზე მაღალ მაჩვენებლებს შორის, მეორეა. მიუხედავად ამისა, ჯერჯერობით კარანტინის დაწესებას ბრიტანეთის ხელისუფლება არ გეგმავს.
  • ესპანეთშიც ინფიცირებულთა რაოდენობა მკვეთრად გაიზარდა. ბოლო ორი დღეა ყოველ დღე COVID-19-ის 10 ათასზე მეტ შემთხვევას აღწერენ.

ჩვენ ევროპაში ძალიან სერიოზული ვითარება გვაქვს. ახლა ყოველ კვირაში კორონავირუსის გაცილებით მეტი შემთხვევა ვლინდება, ვიდრე მარტში, პირველი პიკის დროს, - განაცხადა ჯანდაცვის მსოფლიო ორგანიზაციის ევროპის რეგიონალურმა დირექტორმა ჰანს კლუგმა.

მაშინ, როცა ევროპის ბევრ ქვეყანაში რთული ეპიდემიოლოგიური ვითარებაა, არიან ქვეყნები, სადაც ეპიდსიტუაცია შედარებით სტაბილურია. ასეთ ქვეყნებს მიეკუთვნება ესტონეთი, ხორვატია, შვედეთი, პორტუგალია და ა.შ.

ხორვატიასა და პორტუგალიაში ახალი ინფიცირებულების ყოველდღიური რაოდენობა მართალია, შემოდგომიდან გაიზარდა, თუმცა მას არ მიუღწევია საგანგაშო ნიშნულისთვის. მაგალითად, ხორვატიაში 15 სექტემბრიდან დღემდე, ყოველ დღე 100-დან 300-მდე ახალი შემთხვევა ვლინდება. პორტუგალიაში კი, ბოლო ხუთი დღეა კორონავირუსის ყოველდღიური მაჩვენებელი 400-დან 900-მდე მერყეობს და ეს ამ ქვეყნისთვის საგანგაშო მაჩვენებლად არ ითვლება, მით უფრო, რომ გაზაფხულზე გაცილებით უფრო რთული ეტაპი გამოიარეს.

საინტერესოა შვედეთის მონაცემები, სადაც ივლისის შემდეგ სტაბილურობას ინარჩუნებენ და იმ ფონზე, რომ ქვეყანაში არაფერია აკრძალული, ყოველ დღე ინფიცირების 100-დან 300 შემთხვევამდე ვლინდება.

სტაბილურს უწოდებენ იტალიაში შექმნილ ეპიდსიტუაციასაც. ბოლო ხუთი დღეა ინფიცირებულთა რაოდენობა ყოველ დღე 1500-დან 1900-მდე მერყეობს, რაც მაღალი მაჩვენებელია, თუმცა არასაგანგაშო და ევროპის სხვა ქვეყნებთან შედარებით იქ გაცილებით უფრო კარგი სიტუაციაა. ამ სტაბილურობის შესანარჩუნებლად შესაძლოა, მიზნობრივი, ლოკალური კარანტინი დაწესდეს, საყოველთაო კარანტინის გამოცხადებას კი იტალიის ხელისუფლება ამ ეტაპზე არ გეგმავს.

ჯანდაცვის მსოფლიო ორგანიზაციამ კორონავირუსის პანდემია 11 მარტს გამოაცხადა. ვირუსით, გლობალური მასშტაბით სულ 32.1 მილიონი ადამიანი დაინფიცირდა, მათ შორის 982 412 პაციენტი გარდაიცვალა, ხოლო 23.6 მილიონი გამოჯანმრთელდა.

როგორ ეხმაურებიან მთიან ყარაბაღში განვითარებულ მოვლენებს მოსკოვში, თურქეთსა და ევროპაში

ავიაკატასტროფა უკრაინაში - ბორტზე მყოფი 27 ადამიანიდან 25 დაიღუპა

"ეფექტური ვაქცინის გამოყენებამდე კორონავირუსმა, შესაძლოა, 2 მილიონი ადამიანის სიცოცხლე შეიწიროს" - ჯანმო-ს წარმომადგენელი