"მოკვლით ემუქრებოდა ცოლს და არასრულწლოვან შვილს" - ოჯახური ძალადობის ბრალდებით ახალციხის სკოლის დირექტორი დააკავეს

მეუღლისა და ოჯახის არასრულწლოვანი წევრის მიმართ განხორციელებული მუქარის ბრალდებით ახალციხეში 1 პირი დააკავეს. ამის შესახებ განცხადება ცოტა ხნის წინ შინაგან საქმეთა სამინისტრომ გაავრცელა.

გამოძიების ინფორმაციით, მამაკაცი ცოლს მოკვლით ემუქრებოდა, როდესაც 112- ზე ოჯახის ერთ-ერთმა წევრმა დარეკა.

"გამოძიებით დადგინდა, რომ ბრალდებულმა მეუღლეს - 1975 წელს დაბადებულ ო.კ.-ს და არასრულწლოვან შვილს - 2003 წელს დაბადებულ მ.კ.-ს, წარსულში არსებული კონფლიქტის ნიადაგზე მომხდარი ურთიერთშელაპარაკების დროს, სიტყვიერი შეურაცხყოფა მიაყენა და ჯანმრთელობის დაზიანებით დაემუქრა.

გამოძიება წინასწარი შეცნობით არასრულწლოვნისა და ოჯახის წევრის მიმართ განხორციელებული მუქარის ფაქტზე, საქართველოს სსკ-ის 11 პრიმა 151-ე მუხლის მე-2 ნაწილის „გ“ და „დ“ ქვეპუნქტებით მიმდინარეობს" - ნათქვამია უწყების განცხადებაში.

"რუსთავი 2"-ის ინფორმაციით, დაკავებული მამაკაცი ახალციხის მეექვსე საჯარო სკოლის დირექტორია. ამავე სკოლის პედაგოგია მისი მეუღლეც.

ტელეკომპანიასთან საუბრისას სკოლის თანამშრომლები ამბობენ, რომ მათ ამ დანაშაულის შესახებ დღეს გამთენიისას შეიტყვეს.

"არაფერი არ ვიცით. ახლა თქვეს ოლგასთან იყო პოლიციაო. არაფერი არ შეგვიმჩნევია აქამდე. მსგავსი დანაშაულის შესახებ არაფერი გვსმენია, ამ ინფორმაციის მოსმენა შოკისმომგვრელი აღმოჩნდა" - ამბობენ სკოლის თანამშრომლები "რუსთავი 2"-თან საუბრისას.