სად არის სიმშვიდე? სად შევაფაროთ თავი?
28 სექტემბრიდან „ბიბლიის განმარტებების“ მე-14 ტომს შეიძენს მკითხველი გაზეთ „კვირის პალიტრასთან“ ერთად. გთავაზობთ უკვე ტრადიციად ქცეულ ბლოგს, რომელსაც სპეციალურად ჩვენი საიტის მკითხველისთვის, „ბიბლიის განმარტებების“ პროექტის ავტორი და მთავარი რედაქტორი, თამარ მამაცაშვილი ამზადებს:
ბევრჯერ ვთქვით ეს, მაგრამ... კორონა არ არის რა მთავარი პრობლემა... რაღაც ცუდი პროცესები აგორდა გლობალურად - შიშის ვირუსი შეეყარა ადამიანს, მწვავე ფორმით... ჰოდა დარბის ეს შეშინებული ადამიანი აქეთ-იქით და ვეღარ გაუგია, რა ქნას... მასობრივი ისტერიკაა... ამ შიშს რომ გაექცნენ, ზოგი კორონას არარსებობას ამტკიცებს და ექიმებს ლანძღავს, ზოგს სჯერა პანდემიის არსებობა და თავის შეშინებულობასაც ცხადად აღიარებს... ზოგს ვირუსის არა, მაგრამ ვაქცინის ეშინია, რომლითაც კაცობრიობის მოსპობა უნდათ თურმე... საზარელი საყურებელია შეშინებული მსოფლიო... ალბათ კორონა გაივლის, მაგრამ შიშის ვირუსი ჭკუიდან შეშლის მილიონობით ადამიანს... ერთი ათონელი ბერის ქადაგება მოვისმინე გაზაფხულზე - ვირუსი კი არა, თვით ბოროტი მძვინვარებსო დედამიწაზე...
სად არის სიმშვიდე? სად შევაფაროთ თავი? სად გავექცეთ ამ საშინელებას?ღმერთია ჩვენი თავშესაფარი! ის არის სიმშვიდეც, სიყვარულიც, იმედიც, მომავალიც... დიდი სინანულით უნდა მივიდეთ მასთან... ცრემლიანი სინანულით! და ჩვენი სულებიც იპოვნიან დაკარგულ სიხარულს და ბედნიერებას!
უნდა მივიდეთ აუცილებლად!
***
უნდა შეძლო დაცემის შემდგომ წამოდგომა, რადგან ამაშია ცხონება!
***
პავლე მოციქული ბრძანებს: „სიყვარული სულგრძელია და კეთილმოწყალე; სიყვარულს არ შურს, არ ქედმაღლობს, არ ზვაობს; არ უკეთურობს, არ ეძებს თავისას, არ მრისხანებს, არ იზრახავს ბოროტს...ყველაფერს იტანს, ყველაფერი სწამს, ყველაფრის იმედი აქვს, ყველაფერს ითმენს“...
როგორ გვაკლია ეს ყველაფერი!ჩვენ ხომ ყველაფერში ჩვენსას ვეძებთ - შურიანები, ქედმაღლები, მრისხანენი, უიმედონი... უსიყვარულონი!!!
***
მტკივა, როგორ არ მტკივა - როცა უსამართლოდ მექცევიან, როცა მატყუებენ, როცა თავს ზედმეტად მაგრძნობინებენ, როცა სიკეთის წილ არაკეთილსინდისიერ პასუხს მიბრუნებენ - ძალიან მტკივნეული იქნებოდა ეს ყველაფერი... რომ არ იყოს ერთი უებარი წამალი - უფალს მივანდობ ხოლმე... რათა მათაც კი არ ეტკინოთ, არამედ სიყვარული ჩაიღვაროს ყველას გულში... რათა სინანული ვიგრძნოთ ყველამ, ვინც ვერ ვხვდებით, რას ვაშავებთ...
ღმერთო, აგვიხილე სულიერი თვალები...
***
როცა ხედავ, რომ ქრისტიანი მორწმუნე დაეცა, ნურც გაიფიქრებ, ეს როგორ მოუვიდაო - იცოდე, რომ უფალი მას დიდი აღდგომისთვის ამზადებს. ეს დაცემა კი მისი ცხონებისთვის იყო საჭირო, რათა ისეთი სინანული და თავმდაბლობა შეეძინა, რომ მომავალმა დიდებამ მის გონებას და გულს ხიბლი ვეღარ გააკაროს.
თუ ამის დანახვა არ შეგვიძლია, ისეთივე დაცემის გარეშე ვერც ჩვენ გავივლით ციცაბო ბილიკებს.
***
დიადი სიჩუმე უძღვის წინ ყოველ დიდ ბრძოლას!..
"ეჰა, მეომარნო ქრისტესანო!.."
აუცილებლად! აუცილებლად იქნება დიდი გამარჯვება!
***
ახლა, როგორც არასდროს, დინების საწინააღმდეგოდ ცურვის დრო დგება! არა აქვს მნიშვნელობა, ცურვა ვიცით თუ არა, ნაპირს ვხედავთ თუ ვერა, მდინარის სათავემდე შორია თუ არა, ერთი ცხადზე ცხადია: ეს გამხეცებული დინება უფსკრულისკენ მიგვერეკება ყველას! თუნდ დავიხოცოთ, ოღონდ ბრძოლაში! ოღონდ მძინარენი ნუ გავყვებით ბოროტების მდინარებას... გამოფხიზლების დროა!!! ძნელი არჩევანის გაკეთების დრო! საითაც მივდივართ, იმის საპირისპიროდ წასვლის დრო! უნდა გამოვიღვიძოთ რა! უფალი შეგვეწიოს!
***
სიმინდი ვიყიდე... კი ვატყობდი გამყიდველს, რაღაცის დამალვას ცდილობდა, მაგრამ ვჩქარობდი და... მოკლედ, შინ რომ მოვიტანე, თურმე ორი ტარო ჭიანი ყოფილა და ფუჩეჩს საგულდაგულოდ აფარებდა, რომ არ შემემჩნია... მოუტყუებიხარო - მითხრეს... იმან იკითხოს, ვინც მოიტყუა-მეთქი... მოტყუებული შენ ხარ და იმან რა უნდა იკითხოსო... რა და, როცა ვინმეს ატყუებ, გააცურებ, მოუგებ რაღაცას, აი, მერე რომ მარტო რჩები იმ შენი მოგებული 1 ლარით, როგორი ბედნიერი შეიძლება იყო ადამიანი? ნუთუ არ გაიფიქრებ ერთხელ მაინც, შენ რომ მოატყუე და ჭიანი სიმინდი გაატანე სახლში, იმ ადამიანს გული დაწყდებოდა? იმის გამო კი არა, რომ სიმინდი დააკლდა, უფრო იმიტომ, რომ შენ მოატყუე... განა იმ მოტყუებული 1 ლარით, თუნდაც 10-ით და თუნდაც 100-ით, რა ცხოვრება უნდა აიწყო და რა ბედნიერება უნდა იპოვო? ბედნიერების მთელი ფილოსოფია ხომ ის არის, რომ სხვას სიკეთე უკეთო, სხვისი გახარებისთვის იცხოვრო და ამით იხარო? ჰო, ეგრეა სინამდვილეში: მოტყუებული ის არის ვინც სხვას ატყუებს, ღარიბი ის არის, ვინც სხვას ართმევს, მკვდარი ის არის, ვინც სხვას კლავს... ჰოდა ამიტომ, ისე მოექეციო სხვას, როგორ მოქცევასაც საკუთარი თავისთვის ისურვებდი სხვებისგან... სინანული მოგვმადლოს უფალმა ყველა იმ საქციელის გამო, რაც მოყვასისთვის დაგვიშავებია... უფალმა დაგლოცოს შენ, ვინც მომატყუე და მიგახვედროს, რა არის ნამდვილი სიხარული...
***
ახლა ფეისბუქმა შემახსენა, რომ შარშან სწორედ სექტემბერში პირველი ეგზემპლარი მოუტანიათ რედაქციაში...
რამდენი ბრძოლა გამოვიარეთ მანამდეც და მას მერეც, მაგრამ ერთი წამითაც არ შეგვპარვია ეჭვი, რომ საქმე ბოლომდე უნდა მივიდეს...ახლა "ახალ აღთქმაზე" ვმუშაობთ და წინასწარ ნამდვილად არ დაგვიგეგმავს, არც გაგვითვლია, მაგრამ ალბათ შემთხვევითი სულაც არ არის, რომ ახალი აღთქმის პირველი წიგნის გამოსვლის დღე 23 ნოემბერს, გიორგობას დაემთხვა.
მათთვის, ვისაც ეჭვი ეპარებოდა პროექტის ღირებულებაში, გვაქვს სასიხარულო სიახლე - სასულიერო აკადემიის ბიბლიის კათედრაზე მიმდინარე სასწავლო წლის პროგრამაში უკვე შეიტანეს "ბიბლია განმარტებებით", როგორც ერთ-ერთი სახელმძღვანელო.დიდება და მადლობა უფალს ყველაფრისათვის!
28 სექტემბრიდან - გაზეთ „კვირის პალიტრასთან“ ერთად, „ბიბლია განმარტებებით“, მე-14 ტომი! არ გამოგრჩეთ!
პროექტები, რომლებმაც საქართველოში შექმნა ლიტერატურული ისტორია
რა ზეგავლენას ახდენს ომი ლიტერატურაზე? - წიგნები, რომლებიც ომის შთაგონებითაა შექმნილი
